«Сабантуй» почтасыннан: «Вәрәшбаш мәктәбендә — бер кызык атна»

Галәм чиксез, галәм киңлекләрен галимнәр күпме генә өйрәнсәләр дә, андагы йолдызларның санын исәпләп, планеталарның серен ачып, өйрәнеп бетерә алмыйлар. Инде космоска беренче тапкыр аяк басканга да ярты гасырдан артык вакыт үтсә дә, беренче космонавт Юрий Гагарин турында бүген дә горурланып сөйлиләр. 12 нче апрель һәр җирдә: мәктәпләрдә булмасын, музейларда, балалар бакчаларында, китапханәләрдә булмасын зурлап билгеләп үткәрелә.

Безнең Вәрәшбаш мәктәбендә дә һәр елдагыча математика атналыгы Космонавтика көненә туры китерелеп, апрель аенда уза. Атна дәвамында укучылар үзләренең белемнәрен күрсәттеләр, тәҗрибәләре белән уртаклаштылар, яңа белемнәр тупладылар. Атналык кысаларында Россиянең атказанган хәрби очучысы Шәфиков Рәшит абый белән очрашу оештырдык. Ул безгә тормыш һәм хезмәт юлы, күк җиһанының серләре турында сөйләде.

Атналыкның бер көнне тәҗрибәләр күрсәтүгә багышланды. Бу укучыларны шулкадәр мавыктырды, кемдер куык очырды, кемдер газлы су ясады, кемдер савытка су тутырды, кемдер шул суны бушатты. Нәтиҗәдә иң кызыклы тәҗрибә Абдуллин Рәсүлнеке, ә иң шаккатырганы Абдуллин Рөстәмнеке булды.

12 нче апрель көнне физика укытучысы Хатипова Фирая апа әзерләгән видеоролик карадык. Соңыннан игътибар белән тыңлап утырганлыкны тикшерү максатыннан викторина оештырылды.

Математика укытучысы Мөхәммәтов Айдар абый үткәргән “Космик сәяхәт” уены укучыларны гына түгел, укытучыларны да уйланырга мәҗбүр итте. Ике команда арасында оештырылган ярышта укучылар бер-берсен уздыра-уздыра белгәннәрен әйтергә ашыктылар. “Роскосмос” командасы “Поехали” командасыннан 5 балл белән алга чыгып җиңү яулады. Жюри уенчылар арасыннан җирәбә белән иң яхшы уенчыны: Абдуллин Рөстәмне сайлап алды. Әлбәттә ярыш булгач, җиңүчесе дә була, җиңүчесе булгач, бүләге дә кирәк. Ә укучыларны бүләкләү өчен авыл җирлеге башлыгы Земфира Мирһаҗияновна иганәчелек итте. Һәр катнашучы атналыктан бик канәгать калды.

Мөслим районы Вәрәшбаш төп гомуми белем бирү мәктәбенең 7нче сыйныф укучылары

«Космонавт хатыны» — Люция Әблиева

Малайларның космонавт булырга хыялланулары турында һәрвакыт язып кына торалар. Ә кызлар-йолдызлар хакында ник бер сүз булсын! Аларга Гагарин маяк булса, безнең Терешковабыз бар ич! «Нәрсә, син дә космоска очмакчы булган идеңме әллә?» – дип уйлаганнарнарның өметләре өзелер. Минем исәп… космонавт хатыны булу иде. Күз күрмәс җирләргә җәелеп яткан Советлар иленең бер авылында (егерме йортка бер телевизор!) яшәгән кыз баланың башына бу хыял каян кергән дисезме? Сөйлим алайса.

Авылда сигезьеллык агач мәктәп чак. Без, башлангыч класс укучылары, икенче сменада укып йөрибез. Дәресләр башланыр алдыннан киләбез дә, озын коридордагы эскәмияләргә тезелешеп утырабыз. Коридорның, әйтергә кирәк, берничә функциясе бар. Пионер сборлары, комсомол җыелышлары, дүшәмбе саен тәртип-торышка багышланган «линейкалар» һәм төрле бәйрәм чаралары монда уза. Малай-шалайларның тәнәфес вакытында «әүмәкләшеп» ала торган урыннары да – нәкъ менә шушы коридор. Бина ишелеп төшмәскә терәтеп куелган баганалары исә, «куышлы», «качкалак» уйнау хезмәтен үти.

Коридордагы стенаның буеннан-буена эленгән совет космонавтларның рәсемнәренә беребез дә битараф түгелбез. Каршыда торгач, күзләр гел шунда төшеп тик тора. Хәзерге кебек интернет заманы булмагач, алар турында гәҗит-журналларда аз-маз гына язылган, тегеннән-моннан ишетеп калган мәгълүмат белән генә чикләнәбез. Кызларга килсәк, барыбыз да космонавтларга «үлеп» гашыйкбыз. Алай гына да түгел, үзара бүлешеп тә куйдык әле аларны. Мин Борис Валентинович Волыновны сайладым. Өйдә апаларыма да әйтеп куйдым: «Ары-бире, ялгыш та Волыновка гашыйк була күрмәгез, үскәч аңа үзем кияүгә чыгачакмын!» Шулай итеп, икенче класста укып йөргән чагында «космонавт хатыны» булып киттем.

Берзаман «космонавт хатынын» скарлатина егып салды. Тәнемнең ут булып януына чыдый алмыйм, ялан тәпи кар өстеннән дә йөгергәләп кергәлим. Апалар жәлләп, кәефемне күтәрер өчен төрле-төрле сюрпризлар уйлап чыгаралар. Беркөнне: «Сөенче, Волыновтан хат килде!» – дип, алдыма конверт китереп куйдылар. Ышанасы да килә… килми дә. Конвертны ачсам, саф татар телендә минем исемгә язылган хат ята. «Тизрәк терел, космик сәламнәр белән, Борис Валентинович Волынов», – дигән юлларны укыгач, чүт кенә чирләп яткан диваным белән бергә космоска очып китмәдем, малай! Каян адресны белгән дә, татарча ничек язган диген?! Терелергә туры килде…

Яраткан космонавтымның ике тапкыр космоска очканын да әйтеп китмичә булмас. Беренчесендә җиргә авария хәлендәге режимда төшәргә туры килә аңа. Алган яраларыннан соң башкача оча алмас дип санасалар да, җиде елдан Волынов яңадан космосны яулый. Белгәнмен кемгә гашыйк булырга – ике тапкыр Советлар Союзы Герое исеменә лаек булу теләсә кемгә тәтеми ул!

Люция Әблиева

“Тамчы” театр коллективы балаларны сәхнәгә гашыйк итә

Дәресләр тәмамлануны белдереп, кыңгырау чыңлады. Укудан соң мәктәп укучысы нишли ала? Кемдер телефон уйнарга, кемдер компьютеры янына ашыга. Ә без менә мәдәният йортында эшләп килүче “Тамчы” балалар театрының чираттагы репетициясенә йөгәрәбез.

Безнең “Тамчы” балалар театр коллективы 2013 елда Тукай районы Иштирәк авылы мәдәният йортында барлыкка килде. Безнең җитәкчебез – Хадеева Гүзәл Фәгим кызы, Иштирәк авылы мәдәният йорты режиссеры. Коллективыбызда Иштирәк төп гомуми белем бирү мәктәбенең балалары катнаша. Аларның барысы да театр түгәрәгенә зур теләк белән йөриләр, аннан рухи азык, hәр чыгыштан онытылмаслык яңа, якты кичерешләр алалар.

1 март көнне безнең коллектив Актанышта Әлфия Афзалова исемендәге район мәдәният йортында балалар-яшүсмерләр һәвәскәр театр һәм курчак коллективларының “Иделкәем” республика сморт-конкурсының зона этабында әйбәт кенә чыгыш ясады. Без үзебезнең Тукай районы язучысы Рәзинә Саетгараеваның “Тылсымлы төн” әкият-пьесасын сәхнәләштереп күрсәттек. Әлбәтта пьесага кертелгән уй фикерләр кызыксындыра торган булмаса, ул әсәрне куясы да килмәс иде. Районыбызга, республикага үзенең хезмәтләре белән дан казанган Рәзинә апаның укучыны, тамашачыны үзенең иҗатына тартып тора торган алымы бар. Исәп-хисап белән эш иткән кешенең башында шундый хыялый уйлар булуы безнең өчен шаккатыргыч.

Пьесабызның авторы Рәзинә Габделбәр кызы Сәетгараева Татарстан Республикасының Тукай районы Биклән авылында ишле гаиләдә дөньяга килә. Үзенең тормышын туган авылы, аның кешеләреннән башка күз алдына да китерә алмый һәм аңа бүгенгәчә тугрылыклы.

1980-1984 елларда туган авылы мәктәбендә китапханәче вазифасын башкара. Шул елларда үзен шигърияттә сынап карый. Шигъри осталыгын күреп алып, аны Тукай районы “Якты юл” газетасыда хатлар бүлегенә эшкә чакырып алалар. Рәзинә апа “Якты юл” газетасында хатлар бүлеге мөдире, хәбәрче булып эшләде, үз укучыларын тапты. Иҗат нигезендә туган якка чиксез мәхәббәт, ата-анага, милләтебезгә булган хөрмәт ята.

Бүгенге көндә Рәзинә апаның 5 китабы дөнья күрде, шигырьләре көйгә салынып 2 музыкаль диск чыкты. Рәзинә апаның шигырьләрен укып, һәрбер укучы үзенә ниндидер сабак ала. Алар безне иң беренче урында – сабыр булырга, тормыш кадерен белергә, мәхәббәтне олыларга, бәхетебез өчен көрәшергә, гөнаһларны-ялгышларны кичерергә, бәхетле булырга өйрәтә. Без башкарган пьесада тормышның ачысын татыган сукыр малай турында. Әкияти пьесада аның азактан күрә башлавы, тормышның кадерен белергә өйрәтә, тамашачыны уйландыра.

Театр безне яшәргә, фикер йөртергә өйрәтә. Актерлар белән бергәләп тамашачылар залында утырып, алар кичергәнне тоеп, артистлар белән бергә кайгырып, шатланып утыру —  бүгенге алдынгы техника заманында бернәрсә белән дә алыштыргысыз хистер. Йөрегез, дуслар, түгәрәкләргә! Үкенмәссез!


Сезне хөрмәт итеп, театр коллективы исеменнән, шушы түгәрәккә йөреп сәхнәгә гашыйк булган, алдагы тормышымны сәнгатькә багышларга хыялланган Диләрә Хадеева.

Сүз уңаеннан, балалар-яшүсмерләр һәвәскәр театр һәм курчак коллективларының “Иделкәем” республика сморт-конкурсы җиңүчеләрен котлау тантанасы 25 март көнендә Биектау районының Шәпше авылы мәдәният йортында узачак. Чара сәгать 11.00дә башлана.

Театр сөюче барлык апа-абыйларны, әби-бабайларны, малай-кызларны бу җырлы-биюле бәйрәмгә чакырып калабыз. Күңелле булачак!

Әниемнең җылы кочагы — «Сабантуй» почтасы

Әниемнең җылы кочагы

Әни — һәркем өчен кадерле,изге зат ул. Шуңа күрәдер инде әниләр турында бик күп матур җырлар, шигырьләр иҗат ителгән. Минем дә үз әнием турында сөйлисем килә.

Минем әнием Роза исемле. Роза чәчәге кебек матур,нәфис ул минем әнием. Аның дулкын-дулкын чәчләре чия төсле, нәкъ тә аның назлы күзләре төсендә. Әниемнең нурлы йөзен күреп йокыдан уяну, аның җылы кочагында иркәләнү — минем өчен зур бәхет. Әнием барлык эшен дә җиренә җиткереп башкара, нәрсәгә тотынса, шуны эшли белә. Безгә, өч баласына һәрьяклап үрнәк ул. Мин әниемнең уңганлыгына, тырышлыгына, сабырлыгына сокланам,  әнием кебек изге күңелле, ягымлы булырга тырышам. Әниебез без дәрес әзерләгәндә укытучыга “әверелә”, ә авырып китсәк, “табиб” та була ала — безне сәламәтләндерү өчен бар көчен куя. Безнең эшчән, өлкәннәрне хөрмәт итә белүчеләр булып үсүебезне тели.

Кадерле әнием! Әтиебез белән тигезлектә, безнең уңышларга куанып, бәхетле яшәсәгез иде! Мин сине бик яратам, бәйрәм белән тәбрикләп,матур җырлар бүләк итәм:

Әниемнең кочагы —
Изгелекләр учагы.
“Балам!” — диеп, назлап-сөеп,
Ярат, ярат син тагын!

Шәмсиева Алинә,
Арча районы Түбән Аты төп гомуми белем мәктәбенең 6нчы сыйныф укучысы

Әнием — кадерле кешем

Җир йөзендә иң матур суз-әни.Ул һәр кеше әйтә торган беренче суз,һәм дөньядагы барлык телләрдә дә ул бердәй ягымлы яңгырый.

Әни куллары-иң мәрхәмәтле һәм назлы куллар,алар барын да эшли ала. Мин уземнең әниемне бик яратам, чөнки әни һәрвакыт бөтен шатлыкларны, борчуларымны белеп тора. Уңышларым булса, әниемнең йөзе шатлыктан балкый, ә авырып китсәм, ул, борчылып, мин тазарганчы янымнан китми.

Минем әниемнең исеме – Миләүшә. Ул өйдә хуҗабикә. Ул апам Энҗе белән икебезне дөрес итеп тәрбияләргә тырыша.

Иртән безне тәмле ризыклар белән сыйлап,мәктәпкә озата. Без тәртипле булсын өчен, тырышып укысын өчен бар көченә тырыша. Без әниебезне яратабыз һәм хөрмәт итәбез!

Әнием!

Мин сине Сигезенче Март бәйрәме белән котлыйм! Сиңа бары тик саулык, сәламәтлек, бәхет-шатлык кына телим. Бу бәйрәмдә минем шатлыклы йөзеңне курәсем, сине сөендерәсем килә.

Кояш, кояш мәңге балкый,
Мәңге нур сибә.
Кояш гомере телим мин,
Әнием, сиңа!

Кәримова Гөлия Марат кызы, Түбән Аты төп гомуми белем мәктәбенең 8 нче сыйныф укучысы

Әтиләр — безнең терәк, алар безгә бик кирәк!

Арча районы Түбән Аты төп гомуми белем мәктәбе каршында Әтиләр Советы уңышлы гына эшләп килә. Анда иң актив 5 әти кеше сайлап куелган. Әтиләребез мәктәп тормышы белән даими кызыксынып, ярдәм итеп торалар: һәрчак аларның ярдәмен тоеп яшибез.

Советның рәисе Гаязов Наил Илдар улы — һәр эштә башлап йөрүче. Безнең өчен үрнәк Наил абый МВДда кинолог булып хезмәт куя. Бик җаваплы эштә эшләсә дә, мәктәпкә ярдәм кулы сузарга вакытын да, җаен да таба, башка әтиләр белән дә уртак тел табып, аларны туплый белә.

Мәктәбебездәге 44 укучының 24е — малайлар (!), 20се — кыз балалар. Егетләребезнең булдыклы, тәртипле булып үсүләрендә әтиләрнең, укытучы абыйларның шәхси үрнәге, һичшиксез, зур әһәмияткә ия.

12 кешедән торган укытучылар коллективында 6 укытучыбыз ир-егетләр (!). Алар арасында иң өлкән укытучы — Данис Мәхмүт улы безгә әтиебез кебек якын булса, иң яшь абыебыз Ленар Яхъя улы безгә якын дустыбыз кебек. Ул безне волейбол, футбол уйнау серләренә төшендерә, туризм түгәрәге алып бара. Үзе дә ике бала әтисе булган Илнур Наил улының оста итеп теннис уйнавын күргәч, мәктәпнең барлык малайларына да “теннис җене” кагылды. Үзе таләпчән, үзе шаян Рәдис Наил улы да безгә һәрьяклап үрнәк. Яраткан укытучыларыбыз Фәнил абый, Булат абыйны да бик хөрмәт итәбез.

Арча спорт мәктәбеннән килеп, көрәш түгәрәге алып баручы Таһир абый Лотфуллин турында бик күп сөйләп булыр иде. Нинди яшьтә булуга карамастан (1нче сыйныфмы яки 9нчы сыйныфмы), һәр малай белән уртак тел таба белүче бу абыйны барыбыз да үз итәбез: чын ир-атлар нинди булырга тиешлеген сүздә генә түгел, аның мисалында да ачык күреп була.

Мәктәптә җылы, тыныч булсын дип һәр көнне кайгыртучы Равил, Альберт, Зөлфәт абыйларга да без бик рәхмәтле. Чаңгының каешы ычкынса, куртканың замогы көйсезләнеп куйса, башка көтелмәгән авырлыклар очрап куйса да бу абыйлар безгә үз балаларыдай карыйлар, ярдәм кулы сузарга әзер торалар.

Кадерле әтиләребезне, мәктәбебездәге барлык ир-егетләрне, әбием әйтмешли, “алтын баганаларны” узып киткән зур бәйрәм белән тәбрик итәм. Аларга нык сәламәтлек, гаиләләрендә дә, мәктәптә дә һәрчак хөрмәткә лаек кешеләр булып яшәүләрен телим.

Дәниф Хәмидуллин,
Арча районы Түбән Аты төп гомуми белем мәктәбенең 9нчы сыйныф укучысы.

P.S. «Сабантуй» журналында хезмәт куйган барлык ир-егетләрне бәйрәм белән тәбрик итәбез. Эшегездә уңышлар, сәламәтлек телибез. Изге теләкләр белән, Түбән Аты мәктәбе коллективы.

«Канатлы ат» — Зәлинә Гыйләҗетдинова иҗаты

«Сабантуй» балалар журналын яратып укучылар. Сезне ТР Балтач районы “Советлар Союзы Герое Г.Гарифуллин исемендәге Яңгул урта гомум белем мәктәбе”нең 5нче сыйныф укучысы Гыйләҗетдинова Зәлинә Фидан кызының иҗат җимешләре белән таныштыррыга телим.

Укытучысы: Хаҗиева Л.М.

Әниемне яратам

Мин әнине яратам!
Ул да мине ярата!
Әнием белән бергә,
Һәр көн күңелле үтә.

Әнием белән бергә
Һәр көн файдалы үтә.
Мәктәпкә дә озата –
Әни мине ярата!

Авыр чакта юата,
Кызык итеп уйната,
Әкият укып йоклата –
Әни мине ярата!

Әтием

Ярата үз әтиләрен
Җирдә һәммә кеше дә.
Әмма минем әтиемә
Җитә алмый берсе дә.

Ул булдыра барысын да
Дөрес, авыр эше дә.
Ярдәм сораган чагында
Булыша һәр кешегә.

“Төзүче кызы” дисәләр,
Никтер көләсе килә.
Белмәгәннәргә, мин булам –
Фидан кызы Зәлинә.

Яз җыры

Шаулап акты гөрләвекләр –
Яңгырады яз җыры.
Шәһәрләрдә, авылларда
Яуды ләйсән яңгыры.

Язгы ташкын башлануын
Хәбәр иттем дөньяга.
Зәңгәр бозлар агып китте,
Мин сокландым аларга.

Аңлаталмыйм – сүзләр җитмәс,
Җырламыйм – көй табылмас.
Синең көең, күптәнгечә,
Тагын яшьлек, тагын яз…

 

Сеңлемә

Минем кечкенә сеңлем бар,
Исемнәре Айзилә.
Ничек итеп укыр инде,
Ул бит әле кечкенә.

Быел мәктәпкә барырсың,
Гел “бишлеләр” алырсың.
Әниләрне куандырып,
Спортчы да булырсың.

Үзеңнең бар хыялың –
Армиягә барасы.
Илне саклап, горур булып,
Әйләнеп тә кайтасы…

Тылсымлы таяк

Мин кечкенәдән үк тылсымчы булырга хыялланып үстем. Гади генә тылсымчы түгел, ә тылсымлы таягы белән!

…Мин күзләремне йомам да, шул таякны минем кулда дип күз алдыма китерәм. Таягымны селтәп җибәрүем була, бөтен дөньяда тынычлык урнаша. Сугышлар да булмый, кешеләр дә бер-берсенә бары тик яхшы теләкләр генә телиләр. Африканың сусыз илләрендә чишмәләр калкып чыга, балаларның елаулары түгел, бары тик шат елмаюлары гына ишетелә. Җир йөзенең бөтен сабыйлары да якты, зур мәктәпләрдә укыйлар. Аучылар да җәнлекләрне, кошларны ауламый, бөтен дөнья кошлар сайравыннан яңгырап тора. Бөтен җирдә рәхәт, тыныч…

Мин күзләремне ачам… Ә бу дөньяда һаман да начарлык, сугыш.

Мин зур үскәч, барыбер бу таякны табып, җир йөзен ямьләндерәчәкмен әле!