Сөенечле хәбәр! Аквапаркка кем бара? /исемлек/

Сәлам, «Сабантуй» журналын яратып укучы дусларыбыз! Исегездә булса, узган саннарыбызның берсендә сезне анкета тутырып, үзегез белән таныштырып үтәргә һәм журналыбыз турында фикерләрегез белән уртаклашырга чакырган идек. Бүген редакциябездә бу анкеталарны җибәрүчеләр арасында лотерея уйнатылды.

Барлыгы безнең адреска 28 анкета килде. Аларның барысы белән дә таныштык, безнең журналга рәхмәт һәм мактау сүзләре яудырган укучыларыбыз булуына бик сөендек. Күбегезнең анкеталарында кызыклы гына фикерләр бар иде: кемдер пәйгамбәрләр турында укырга тели, кемдер Роналду кебек йолдызларның тормышы белән якынрак таныштыруны сорый, ә бер укучыбыз язучы балаларының тормышлары белән кызыксына икән.

«Сабантуй» журналын яздыручы, һәр санын яратып укып баручы, бәйгеләребездә даими катнашучы дусларыбызга барлык редакция исеменнән рәхмәтебезне белдерәбез. Киләчәктә дә бергә булыйк!

Ә хәзер — җиңүчеләр исемлеге. Лотереябызда очраклы рәвештә 5 сан тартып алынды. Алар исемлек буенча түбәндәге укучыларыбызга туры килде:

Шагалиева Гайшә, 10 яшь, Алабуга

Миннеханов Самат, 12 яшь, Балык Бистәсе районы, Күгәрчен авылы

Мифтахов Илсур, 11 яшь, Әлмәт районы, Кама-Исмәгыйль авылы

Мөбәрәкҗанов Булат, 11 яшь, Саба районы, Байлар Сабасы авылы

Рәхмәтуллин Бәхтияр, 7 яшь, Чистай шәһәре

Сез барыгыз да Аквапаркка билетлар белән бүләкләнәсез. Котлыйбыз сезне!!!

Билетларны кайчан һәм кайдан алып китүне белешер өчен сез 8-917-283-65-45 телефоны аша 26 февральдән соң шалтырата аласыз.

«Канатлы ат» — Зәлинә Гыйләҗетдинова иҗаты

«Сабантуй» балалар журналын яратып укучылар. Сезне ТР Балтач районы “Советлар Союзы Герое Г.Гарифуллин исемендәге Яңгул урта гомум белем мәктәбе”нең 5нче сыйныф укучысы Гыйләҗетдинова Зәлинә Фидан кызының иҗат җимешләре белән таныштыррыга телим.

Укытучысы: Хаҗиева Л.М.

Әниемне яратам

Мин әнине яратам!
Ул да мине ярата!
Әнием белән бергә,
Һәр көн күңелле үтә.

Әнием белән бергә
Һәр көн файдалы үтә.
Мәктәпкә дә озата –
Әни мине ярата!

Авыр чакта юата,
Кызык итеп уйната,
Әкият укып йоклата –
Әни мине ярата!

Әтием

Ярата үз әтиләрен
Җирдә һәммә кеше дә.
Әмма минем әтиемә
Җитә алмый берсе дә.

Ул булдыра барысын да
Дөрес, авыр эше дә.
Ярдәм сораган чагында
Булыша һәр кешегә.

“Төзүче кызы” дисәләр,
Никтер көләсе килә.
Белмәгәннәргә, мин булам –
Фидан кызы Зәлинә.

Яз җыры

Шаулап акты гөрләвекләр –
Яңгырады яз җыры.
Шәһәрләрдә, авылларда
Яуды ләйсән яңгыры.

Язгы ташкын башлануын
Хәбәр иттем дөньяга.
Зәңгәр бозлар агып китте,
Мин сокландым аларга.

Аңлаталмыйм – сүзләр җитмәс,
Җырламыйм – көй табылмас.
Синең көең, күптәнгечә,
Тагын яшьлек, тагын яз…

 

Сеңлемә

Минем кечкенә сеңлем бар,
Исемнәре Айзилә.
Ничек итеп укыр инде,
Ул бит әле кечкенә.

Быел мәктәпкә барырсың,
Гел “бишлеләр” алырсың.
Әниләрне куандырып,
Спортчы да булырсың.

Үзеңнең бар хыялың –
Армиягә барасы.
Илне саклап, горур булып,
Әйләнеп тә кайтасы…

Тылсымлы таяк

Мин кечкенәдән үк тылсымчы булырга хыялланып үстем. Гади генә тылсымчы түгел, ә тылсымлы таягы белән!

…Мин күзләремне йомам да, шул таякны минем кулда дип күз алдыма китерәм. Таягымны селтәп җибәрүем була, бөтен дөньяда тынычлык урнаша. Сугышлар да булмый, кешеләр дә бер-берсенә бары тик яхшы теләкләр генә телиләр. Африканың сусыз илләрендә чишмәләр калкып чыга, балаларның елаулары түгел, бары тик шат елмаюлары гына ишетелә. Җир йөзенең бөтен сабыйлары да якты, зур мәктәпләрдә укыйлар. Аучылар да җәнлекләрне, кошларны ауламый, бөтен дөнья кошлар сайравыннан яңгырап тора. Бөтен җирдә рәхәт, тыныч…

Мин күзләремне ачам… Ә бу дөньяда һаман да начарлык, сугыш.

Мин зур үскәч, барыбер бу таякны табып, җир йөзен ямьләндерәчәкмен әле!

Кар бөртеге бигрәк матур… — Укучыларыбыз иҗаты

Кар бөртеге!

Кар бөртеге бигрәк матур —
Ялтырый кулларымда.
Җем-җем итеп сибелгәннәр
Барасы юлларымда.

Тәрәзәгә килә дә ул
Урамга мине дәшә.
Һәр көнне шулай елмаеп
Безгә шатлык өләшә.

Булат Гатауллин,
Әтнә району, Күәм мәктәбе

Алинә Сәмитова — Инстабәйге җиңүчесе!

«Мин кечкенә яшьтән үк әле укый да белмәгәндә, минем кулымда инде «Cабантуй» журналы булганлыгын яхшы хәтерлим. Ә азрак үсә төшкәч, мин инде үзем укый да башлагач, миндә кызыксыну көннән-көн арта барды. Журналның кайдан һәм ничек безнең кулларга җиткәнлеген, аны кемнәр шулкадәр матур итеп эшләгәннәрен үз күзләрем белән күрәсем килде. Бу минем өчен зур хыялга әйләнде.

Шулай “Сабантуй” журналының бәйгеләренә дә катнаша торгач мин җиңү яуладым, һәм мин бүләкләнү өчен “Сабантуй ” редакциясенә бардым. Бу минем өчен иң шатлыклы көннәремнең берсе булды, һәм кечкенәдән булган хыялым да чынга ашты.

Мине редакциядә ачык йөз белән каршы алдылар. Миңа истәлекле бүләкләрне һәм дипломны «Сабантуй» журналының баш мөхәррире Илназ абый Фазуллин тапшырды.
Рәхмәт сезгә бик зур мине сөендерүегез өчен!

Сезнең яннан мин бик шат күңел белән кайттым.

Алинә Сәмитова, Буа районы, Аксу авылы»

Яңа елда — яңача «Сабантуй»!

Дуслар, менә кабат бергәләшеп яңа — 2018 елга аяк бастык. Безнең өчен бу ел бик уңышлы булачак — чөнки безнең белән «Сабантуй» журналын яратып, сагынып көтеп алучы дусларыбыз бар. Алай гына да түгел — яңа елда яңа нәни дусларыбыз да күбәйде — быел язылучылар саны артты! Мондый шатлыклы хәбәрләр яңа үрләр яуларга көч бирә. 

Тагын бер яңалык — «Сабантуй» 2018 елдан башлап айга бер тапкыр 32 битле калын, матур төсле, хуш исле журналга әйләнде. Аның битләрендә күбрәк башваткычлар, мавыктыргыч язмалар, конкурслар, уеннар һәм иҗат эшләре булачак. Дустым, хәзер син үзеңнең шатлыклы вакыйгаларың, ирешкән уңышларың турында уртаклашасың килсә, яки үзең язган матур шигырьләр, үзең ясаган матур рәсемнәр белән бүлешәсең уйласаң — бел: «Сабантуй» редакциясе синең хатларыңны зарыгып көтеп ала.

Әгәр «Сабантуй» журналына язылып өлгермәгән икәнсез — борчылырга урын юк. Моны һәр айдан эшләп була. Почта бүлекчәсенә юл ерак икән, итернет — кул астында: https://podpiska.pochta.ru/press/%D0%9F2336 сылтамасы аша кереп языла аласыз. Бер айга язылу бәясе — 65 кенә сум.

Нәни дусларыбыз! Быел тагын да ныграк дуслашыйк, элемтәдә булыйк:

«Сабантуй» төркеме Вконтактеда

«Сабантуй» төркеме Одноклассникида

«Сабантуй» төркеме facebookта

«Сабантуй» төркеме instagramда

Безнең электрон адресыбыз: sabantui@bk.ru