Артист халкы балалары белән тау шуа: Иркә кызы кар ашый, Зөлфәт Зиннуров төнлә тау ясый, Лилия Муллагалиева бер яшьлек улына кар көрәтә /ВИДЕОЛАР/

Артист халкы җырлый гына түгел, шәп итеп кышның матур көннәрен балалары белән дә уздыра белә, аларның күңелен күрә.

Мисал өчен җырчы Иркә туган ягы Аксубай районы Яңа Ибрайга әти-әнисе янына кайткан. Кечкенә кызлары белән бакча артына чана шуарга чыкканнар. Уртанчы кызы Әминә чана шуган арада, төпчеге Сөембикә кар ашарга да өлгерә. Моны күреп алган Иркә: “Ах, сине! Төпчек борыным, чебеш борынмы син? Нишләп син хәзер кулларыңны артка куйдың? Чөнки син кар ашадың”, — дип яратып кына орышып та куя.

Җырчы Гөлназ Шәрипҗанова да иренең туган ягы Актанышта гаиләсе белән ял итә. Ире Илсур аларны кызы Асылбикә белән чанага утыртып урам буйлап тартып йөри. Менә кайда ул күңелле! Чын кыш! Чын ял! “Авылда шундый рәхәт! Кар көрәдек, чана шудык, бияләй суырдык. Рәхәтләнеп йоклыйбыз хәзер”, — ди Гөлназ.

“Башваткыч” тапшыруын алып баручысы Зөлфәт Зиннуров та кызларының күңелен күрергә онытмый. Төн дип тормаган, өй янында гына балаларына кардан тау ясап, аңа су сибеп, катырып куйган. “Балалар дигәндә нәрсә генә эшләмисең инде! Әйбәт булырга тиеш бу, Алла боерса! Тауга менә торган җирләре дә бар. Рәхәтләнәбез инде шуып”, — ди шоумен.

Төнлә дә ясарга була тау!))

Публикация от Зульфат Зиннуров (@zulfat_zinnurov)

Кызы Зәлияне чанада шудырырга да онытмый Зөлфәт. Яраткан этләре Назлы Зәлияне чанада тартып барган видеосын да урнаштырган әти кеше. “Иң рәхәте — авторитетка. Өйгә хәтле ятып кайта Назлы белән”, — ди ул.


Җырчы Лилия Муллагалиева өй тәрәзәсе аша гына бер яшьлек улы Ильясның әтисе белән бергә кар көрәгәнен күзәтә.

Хәния Фәрхинең кызы Алсу: “Беренче тапкыр туган көнемне уздырмадым” /фото, видео/

24 декабрьдә Хәния Фәрхинең төпчек кызы Алсу Вәлиеваның туган көне иде. Алсу быел беренче тапкыр туган көнен уздырмады. Сәбәбе аңлашыла да кебек… Бу көннәрдә ул әнисе белән бәйле мизгелләр белән уртаклашты.

“Иң рәхәт чаклар… Сагынам шул мизгелләрне”, дип әнисе белән карда аунаган видео да урнаштырды.

– Беренче тапкыр үземнең туган көнемне уздырмыйм, – дигән Алсу “инстаграм” аккаунтында. – Белмим нигә… Теләк юк. Бәйрәм кәефе юк. Якыннарыма, әтием, Алия апа, Руслан (ире – авт.), иремнең әти-әниләренә рәхмәт әйтәсем килә. Әни, беләм син дә һәрвакыт минем белән. Минем йөрәгемдә. Төшемдә дә: “Кызым, мин һәрвакыт синең артыңда булырмын”, дидең бит. Бүген әле әти белән әнинең өйләнешкән көннәре дә. 1994 елның 24 декабрендә алар язылышканнар. Нәкъ бер елдан соң 24 декабрь көнне мин туганмын. Иртән торуга, әни безне һәрвакыт ак розалардан торган букет көтә иде. Берсе – миңа, берсе — әнигә. Әти безне шулай бәйрәмебез белән котлый һәм бу бер традициягә әйләнгән иде.

Ин рэхэт чаклар… Сагынам шул мизгеллэрне 😓

Публикация от 🕊make-up & hair 🕊 (@valik_alsu)

Чыршы бәйрәменә Рөстәм Миңнеханов улы Искәндәр белән килде /фотолар/

Бүген “Татнефть-Арена” боз сараенда Республикабыздагы иң матур чыршы бәйрәме узды. Чараны талантлы, уку алдынгылары булган, төрле олимпиадалара катнашып җиңү яулаган 7 меңгә якын бала карады, сәхнәдә барлыгы меңнән артык артист катнашты. Кыш бабай ролендә – Г.Камал театры артисты Фәнис Җиһанша иде. Әлеге яңа ел бәйрәме 90 еллардан башлап үткәрелә.

Быелгы чараның тигез күләмдә – рус һәм татар телләрендә әзерләнүе һәм алып барылуы сөендерә. Кайсы телдә сөйләнде, шул телнең тәрҗемәсе экранда субтитр буларак тәкъдим ителде. Хәтта җыр сүзләренә кадәр тәрҗемә ясалган иде. Бәйрәмнең беренче сәгате җыр-бию белән үрелгән әкият күренешләреннән гыйбарәт булса, икенче өлешендә Россия артисты, танылган җырчы Алексей Воробьев үзенең җырлары белән балаларның күңелен күрде. Кемгәдер аның микрофонына кушылып җырлау, икенчеләренә аның кулын тотып карау бәхете дә татыды.

Республика чыршысына улы Искәндәр белән Татарстан Президенты Рөстәм Миңнеханов та килде. Үзенә сүз бирелгәч, бәйрәм чыгарылышыннан бик канәгать калуын әйтеп узды. Катнашучыларга, бәйрәмне әзерләүчеләргә рәхмәтен җиткерде.

Чыршы бәйрәме һәрбер баланың хәтерендә матур, истәлекле мизгелләр калдырып, күңелләренә бәйрәм алды рухы өстәде.

Моннан кала, 106 бала Мәскәүгә Кремль чыршысына да барачак (балалар йортында, приютларда тәрбияләнүчеләр, төрле олимпиада, спорт ярышларында зур урыннар яулаучылар, хезмәт вакытында яра алган эчке эшләр министрлыгы хезмәткәрләренең балалары).

Бәйрәм мизгелләрен инстаграмда #елкататарстан2017 хештегы аша карарга мөмкин.

Бу кызык! Бәйрәмгә узган елдагыча 20 миллион тирәсе акча тотылган.

Нәзилә ҖӘЛӘЛИЕВА

Нәни бала белән яңа ел бәйрәменә…

Яңа ел җитәргә санаулы көннәр калып бара. Бу исә театрлар, концерт залларында балалар өчен кыш бабай, кар кызы катнашында берсеннән-берсе кызыклы чаралар уза дигән сүз. Әлеге тамашаларга бик кечкенә балалар белән бару үз-үзен аклыймы һәм бу, гомумән, дөрес карармы – бүген шул турыда сөйләшик әле.

Әлбәттә, һәр әти-әнинең яңа ел алдыннан баласын сөендерәсе килә. Төрле тамашалар вакытында нәниләрнең сөенеч тулы күзләрен күреп, үзең дә, ирексездән, балаңны шунда алып барырга хыяллана башлыйсың. Тик менә психологлар фикеренчә, әлеге тамашалар нәниләрнең күбесе өчен стресс булырга мөмкин икән. Шуңа күрә билетларны берничә тамашага берьюлы алып алып куйганчы, башта бер генә бәйрәмгә барып карау таләп ителә.

Шунысы кызык, монда сүз бер яшьлек кенә түгел, ә өч-дүрт яшьлек балалар турында да бара. Мәсәлән, ике яшьтә рәхәтләнеп чыршы тирәли әйләнгән бала, өч яшендә бу тамашалардан уттан куркыккан кебек куркырга мөмкин икән. Шуңа күрә минем балам инде зур дип уйлап, юкка акча сарыф итү шулай ук дөрес булмаячак.

Хәзер безгә яшь тә дүрт ай һәм шушы көннәрдә генә дә кызым ике шундый тамашага чакырулы. Башта бармаска уйлаган идем дә, аннары исә фикеремне үзгәрттем – барып, күреп кайтырга карар кылдык – ошатмаса, өйгә юл тотарбыз, янәсе.

Тик әлеге бәйрәмгә барыр алдыннан яхшылап әзерләнергә карар кылдым. Аллага шөкер, интернетта хәзер теләсә-нинди мәгълүмат табарга мөмкин. Алар белән сезне дә таныштырам, бәлки ярдәме тияр.

Бактың исә, тамаша залында беренче биш-ун минутта баланы күтәреп торсаң яхшы икән. Чөнки аларның күбесе шулкадәр халык күрүгә берара куркып калырга, хәтта елап та җибәрергә мөмкин ди. Бераз күнеккәч кенә идәнгә төшерергә ярый.

Шулай да, нәни бала белән яңа ел тамашасына баруның төп кагыйдәсе нинди дип уйлыйсыз? Баланы кыш бабайдан читтәрәк тотарга тырышырга кирәк икән, ләбаса! Бактың исә, күп балалар сәер итеп киенгән, йөзе ап-ак сакал-мыек белән капланган әлеге яңа елның төп билгесеннән уттан курыккандай курка ди. Шуңа күрә ясле балалары катнашындагы яңа ел тамашалары күп очракта кар кызы катнашында гына үтә икән. (Менә сиңа мә… интернетны ачып укымасам, бу турыда уйлау башыма да кереп чыкмас иде. Тәҗрибәле әниләр миннән кыкырып көлгәннәрдер инде…)

Аннары соң яңа ел тамашасында сезнең нәни баланы сагалап торган тагын бер куркыныч бар. Нәниегез зал буйлап йөгерешеп йөрүче башка зуррак балалардан саклана алмаячак, шуңа күрә аны чыршы әйләнәсендәге тамаша вакытында этеп егулары, алай гына да түгел, таптап китүләре дә бик мөмкин. Шуңа күрә әни кешегә бу чарага каблуклы аяк киеме киеп бармаса яхшы. Бала артыннан йөгереп йөрү күпкә уңайлырак булачак.

Тагын бер мөһим кагыйдә – әлеге залның шактый салкын булуы да мөмкин. Шуңа күрә баланы җылырак итеп киендерү ягын карагыз. Ә кызу булган очракта һәрвакыт чишенергә мөмкин.

Шунысы да бар: хәзер авырулар, салкын тиюләр ешайган чор. Өстәвенә, балалар бер-берсенә чирне аеруча тиз йоктыра. Шуңа күрә халык күп булган урыннарга барганда, баланың борынына вирусларны тоткарлый торган препаратлар салу кирәк. Кайткач исә, борынны яхшылап юдыру таләп ителә…

Менә шулар, җәмәгать. Әлеге кагыйдәләрне “колагыма элеп куйдым да”, Аллага тапшырдым. Яңа ел тамашасына барасы гына калды…

Яшь әни язмалары…

Салават Фәтхетдинов инвалид коляскасында утыручы баланың хыялын тормышка ашырган! Ничек итепме?

“Инсаф исемле яшь дустымның зур хыялы булган. Үзен спорт картингына утыртып әйләндерүебезне теләгән. Инсафка ошады. Киләсе тукталыш – Г.Камал театры. Кешеләр, яхшылык эшләүдән курыкмагыз”, – дип язып куйган Салават Фәтхетдинов үзенең инстаграм аккаунтында.