Гомерем дә жәл түгел сиңа, балам /сукыр әни кыйссасы/

Минем әниемнең бер күзе юк. Нинди вакыйга аны күзсез калдыргандыр, төпченгәнем булмады. Тик бу факттан качу мөмкинлеге дә юк, шуңа мин күзсез әниле булуыма оялудан тилмереп яшим.


Кимчелеге зур шул: кеше алдында әнидән бик оялам. Ничек шундый әни белән җитәкләшеп мәктәпкә барырга кирәк?! Әтием дә юк ичмаса… Әни әби һәм миннән торган гаиләбезне берүзе тарта. Күзсез булу гаебен юу өчен минем белән һәрчак ягымлы сөйләшә, һәрчак яңа уенчык, кыйммәтле телефон кесәмдә, ялларда һәрвакыт кызыклы шөгыльләр уйлап таба, бөтен теләгән җиремә бара, миңа берни дә кызанмый. Үз өстенә генә берни алып кими, бизәнә дә белми бугай ул. Әнә, Рамилнең айфоны булмаса да, әнисе гел матур: өстендә чәшке тун, биек үкчәле туфлиләр, кып-кызыл помада… Андый әнием булсамы соң!

***

Күзсез әнием мин укый торган мәктәпкә эшкә урнашкан бит, әй. Адәм көлкесе! Ашханәгә барырлыгымны калдырмады! «Улым, сиңа җәйгә вилсәпид алырга тырышам бит, үзең сорадың лабаса!»- ди бит әле, кызармый да. Сораса ни! Беткәнмени эшләр җир?! Классташларым күзсез әниле икәнемне белсә, оятыма ничек чыдармын!

Бәла үзен озак көттермәде. Дөресрәге, наданрак әнием сыйныф бүлмәсенә миңа бутерброд кертте. Имеш, ач йөрмә, улым. Имеш, ашханәгә дә килмәдең, улым. Кәнишне, килмәдем, анда бит күзсез әни! Чәнечкеле сораулар озак көттермәде.

— Бу одноглазая синең әниең что ли? — дип, боксчы Рәмис күзен акайтты.

Уф, кадалсын иде шунда! Мондый әниле булганчы үлүең артыктыр!

Кич кайтып әнигә ни эшләргә яраганын, ни ярамаганын аңалтырга туры килде. Йөрмәсен монда кирәкмәгән җиргә борынын тыгып!

***

Мәктәпне тәмамлагач бу мәхшәрдән котылу өчен бүтән шәһәргә укырга киттем. Әллә башлы булуым, әллә әнинең түләүле репититорларга йөртүе ярдәм итте шунда, бер каршылыксыз юридик факультетка укырга да кереп куйдым. Әнидән баш тартып китсәм дә, атна саен акча сала башлады. Борчылып шалтыратуларына җавап бирмәдем. Нигә кирәк ул элемтә? Ә менә акчасы бик урынлы, зур шәһәрдә авыргарак туры килә.

Инде икенче курста адвокат конторасына эшкә урнаштым, үзем акча эшли башладым. Әни җибәргән акчаны да кушкач тормышым күзгә-күренеп җиңеләйде. Күзсез әни үзе генә ничек яшәп яткандыр, анысын белмим. Әби үлеп киткән дип ишеткән идем ишетүен.

***

Әзрәк тәҗрибә туплап үземнең шәхси адвокат конторамны ачып җибәрдем, өйләндем, квартира алдым. Озак та үтмәде улым туды. Тормыш тыныч кына бер җайга ага башлады.

Соңгы арада әни төшемә кереп йөдәтә башлады. Имеш, минем күзем юк, әни кытыршы кулы белән сыйпагач кына күзем пәйда була икән. Шушы күз күпме җанымны талкыр инде тагын!

***

Иртән балаларны бакчага илтергә чыкканда ишекне ачып җибәрсәм әни тора. Ник килгән ул? Тагын мине оятка калдырыргамы исәбе?

— Улым…
— Ник килдең? Бу куркыныч кыяфәтең белән белән балаларымны куркытмакчы буласыңмы?
— Сәламәтлегем какшый бара, сине, улларыңны күреп калыйм дидем, улым…
— Нәрсәгә алар сиңа?! Тагын эшкә килеп анда адәм көлкесенә калдыр! Синең аркада күргәннәрем болай да җитәрлек! Ычкын моннан, югал! Шул бер күзең белән юлны табарсың дип өметләнәм.
— Улым, зинһар, кичерә күр, теләгем изгедә иде. Улларыңа күчтәнәч булса да калдырыйм…
— Ычкын дим!

Менә ник төшемә кереп азаплаган икән…

***

Көннәрдән беркөнне кластташларымнан хәбәр килеп төште: очрашу планлаштыралар икән. Барып үземне күрсәтеп кайтмый ярамас. Белсеннәр кем белән укыганнарын, күрсеннәр ирешкән дәрәҗәләремне!

Хатынга дөресен әйтеп тормадым, аның кәнәгатьсезлекләрен тыңлаганчы, әзрәк хәйләләвең кулайрак. Командировкага дигән сылтама белән туган шәһәремә юл тоттым.

***

Очрашу алдыннан үзем яшәгән әни өенә барып килергә иде. Ишек ачучы булмады. Күршегә шакыгач, әнинең вафатын хәбәр иттеләр, үзе калдырган өйнең ачкычын бирделәр.

Бусаганы атлауга балачак елларыма кайттым. Стенага теге юлы әни мәктәп ашханәсендә эшләп алган велосипедым сөялгән. Шкаф киштәсендә минем 3 яшьлек чагымдагы фоторамка тора. Дәрес әзерли торган өстәлемдәге китап-дәфтәрләр дә мин калдырганча. Ә менә бу минем сәгатем, әни аны продленканың күпме калганын карап торсын дип алып биргән иде.

Беренче тапкыр күңелемне әнине кызгану хисе биләп алды…

Шул өстәл өстеннән «Улыма» дигән бөкләнгән хат табып алдым.

«Балам! Ничек кенә миннән читләшсәң дә, картлык көнемдә ташлап еракларга китсәң дә, гомерем буе сине уйлап, изге теләктә яшәдем, догамнан калдырмадым.

Теге вакытта өеңә килеп баларыңны куркытканым өчен, зинһар, гафу ит, бердәнберем! Теләгем сиңа, гаиләңә бер күз салу гына иде. Гомер буе минем аркада оялу хисе кичереп яшәгәнең өчен дә кичер.

Тик шуны бел: 3 яшьлек чагыңда, туп артыннан йөгергәндә егылып тимерчыбыкка кадалдың. 1 күзең агып чыккан иде, табиблар тора-бара бөтенләй сукыр калуыңны фаразлады. Гомерең караңгылыкта, сукырлыкта узмасын өчен шул көнне үк табибларга 1 күземне сиңа күчереп утыртуга рөхсәт кәгазе яздым. Минем күзем аша дөнья каравың белән горурланам! Шул вакытта гомерең кирәк дип сорасалар, анысы да жәл булмас иде, балам!

Тормышыңны бәхеттә, сәламәтлектә үткәрергә язсын. Оныкларыма әйбәт әти, киленемә үрнәк ир бул. Барысына да сәлам җиткер.

Бәхил бул.

Сине гомере буе көтүче, Әниең»

Илүзә ГАЙНЕТДИНОВА

Сукояр йолдызлыгында туган балалар — чын табышмак!

Физика укытучылары телендә әйтсәк, Сукояр-балалар уран, электр көче һәм югары сыйфатлы дулкыннардан тора дияр идек. Алар — бүгенге көн белән яшәми, һәрчак киләчәк турында уйлап, план коручылардан булырлар.

Сукояр-балалар бәйсез, кире, уйлап табучан һәм үзенчәлекле фикер йөртүчән. Вакыты-вакыты белән әти-әниләр хәтта баласын гений дип тә уйларга мөмкин.

Сукояр-бала — чын табышмак. Аның характерындагы үзенчәлекләр кече яшьтән күренә башлый. Күп очракта кечкенә чагында аны киребеткән бала буларак кына сурәтләп була. Ул әти-әнисенең барлык үтенечләрен кире кага, сүзен тыңламый, бер сорауга йөз җавап таба. Аның белән бар нәрсәгә дә әзер булып торырга кирәк. Тик үсә төшкәч олылар аның чын характеры һәм тормышчан карашлары формалашканын күрер.

Сукоярларны өйрәтү, тәрбияләү җиңелләрдән түгел. Ничек кенә мөстәкыйль булмасын, әти-әнигә баласына туры юл күрсәтергә кирәк булачак. Кайсы өлкәдә уңышлырак — аны шул юнәлеш буенча үстерегез, сайлаган юлыннан тайпылдырмагыз. Йөз эшне бергә алып барып уңышка ирешә алуы икеле.

Мәктәптәге укуына килгәндә: бер мәхәббәт җимешегез өчен гоурурланып үлә язсагыз, икенче юлы оятыгыздан җир тишегенә кереп китәрдәй булырсыз. Гаҗәпләнмәгез — Сукояр-бала шундый була. Укытучылар да бер зарланыр, бер мактар.

Табиб, хисапчы, укытучы кебек һөнәрләр аңа кызык булмаячак. Балерина, ихтиолог, антрополог — менә ул чын һөнәрләр!

Кечкенәдән аны берәр спорт секциясенә бирегез: ул аны дисциплинага өйрәтер.

Еш кына Сукоярлар пессимизм рухына бирелеп, тиз кызып китүчән булалар. Аның өчен гаиләдәге атмосфера бик мөһим. Мөмкин кадәр аңа карата ягымлы, аңлаучан булыгыз. Сукояр-бала яхшылыкны онытмас.
Аның дуслары, танышлары күп. Ул алар белән тиз дуслаша, тиз аерылыша. Сукояр кешенең нинди социаль статуслы булуына игътибар бирми. Аның өчен барысы да, Тукай әйтмешли, дус һәм туган.

Слинг, кенгуру һәм эрго рюкзак: кайсын сайларга?

Бәлки, күпләр бу сүзләрнең нәрсә аңлатканын да аңламый торгандыр. Тик, ышаныгыз, боларның өчесе дә яшь әниләргә яхшы таныш. Тик менә баланы күтәреп йөрү өчен аларның кайсын сайларга? Менә монысы турында инде тәфсилләп укымый, белешми мөмкин түгел.

Әйе, кесәдә акчаң булса, хәзер әллә ниләр бар. Берәр җиргә барырга җыенган вакытта хәзер әти-әнигә коляскалар гына түгел, слинг, кенгуру һәм эргорюкзаклар да ярдәмгә килә. Нәрсә турында сүз барганлыгын аңлагансыздыр инде: болар – баланы күтәреп йөрүне җиңеләйтү өчен махсус уйлап табылган, заманча итеп әйтсәк, аксессуарлар. Дөрес итеп файдаланган очракта алар әни кешенең чын мәгънәсендә алыштыргысыз ярдәмчеләренә әверелә. Бил авырту, аркага кан төшү кебек проблемалар турында тулысынча оныту мөмкинлеге туа. Шуңа күрә алар яшь әниләр арасында елдан-ел популярлаша да инде.

Тик шунысы мөһим, бу җайланмаларны дөрес итеп сайлый белергә кирәк. Гомумән, алар турында беренче тапкыр ишетүчеләр өчен әлеге өлкә ерып чыгып булмаслык кара урман кебек тоела. Нәкъ менә шуңа күрә мин булачак әниләргә ярдәм итәргә булдым да инде.

Слинг – гади сүз белән әйткәндә, шактый үзенчәлекле зур, озын шарф. Файдалану ысулы: аны яхшылап гәүдә тирәли бәйлисең дә, шуның эченә баланы салып куясың. Телисең икән, бала синең каршыңа, я булмаса инде аркаңа урнаша. Шулай ук аны кырыйга беркетү мөмкинлеге дә бар. Дөрес итеп беркеткән очракта, әни кеше бала белән рәхәтләнеп велосипедта да йөри алачак, дип ышандыра белгечләр. Бәясе дә әллә ни кыйммәт түгел – 1500 сумнан башлана, ялгышмасам.

Моннан тыш, аңарга яңа туган сабыйны да урнаштырырга мөмкин, хәтта. Бала бөтен гәүдәсе белән әнигә берегә. Бу исә аңа якын кешесенең җылысын тою, яхшрырак үсү, камилләшү өчен менә дигән мөмкинлек. Хәер, интернет челтәрендә баланы слингка дүрт айга кадәр салырга ярамый дигәнрәк фикерләр дә бар – ни дәрәҗәдә дөрестер, белмим.

Аның каравы, слингтан файдалануның кимчелекле яклары да юк түгел. Алар, беренче чиратта, әлеге шарфны дөрес итеп бәйләү белән бәйле. Ышаныгыз, бу бер дә җиңел түгел. Кайчакларда интернеттагы өйрәтү видеолары да ярдәм итмәскә мөмкин, хәтта. Тик моңардан бик җиңел генә чыгу юлы бар. Хәзер слинг бәйләргә өйрәтүче белгечләр киң таралыш алды. Алар барысын да тәфсилләп аңлата, сөйли, күрсәтә. Акчаң гына булсын…

Баланы күтәреп йөрү җайланмасының тагын бер төре – кенгуру. Бу- слингтан аермалы буларак, махсус сумка, рюкзакны хәтерләтә. Аңарга баланы утыртасың да, җилкәңә асып куясың. Беренче карашка, шуннан да уңайлырагы юк кебек. Тик үз тәҗрибәмнән чыгып әйтәм: әлеге төр букчаларда балага шактый уңайсыз: я аяклары асылынып тора, я башы…

Хәер, хикмәт уңайлылыкта гына да түгел. Ул куркынычсызлык ягыннан да слингтан калыша. Мәсәлән, баланы вертикаль рәвештә үзеңә каратып утырту ысулын гына алыйк. Слингта бала тулысынча сиңа береккән, ныклап бәйләп куелган. Ә кенгуруда ул алга таба иелсәң, асылынып тора булып чыга. Ягъни, аның гади рюкзактан бер аермасы да юк. Бәясе дә слингныкы тирәсе. Әлбәттә, кыйммәтлерәк вариантлар да юк түгел.

Ә эргорюкзак исә кенгуруның бер төре. Аны бу язмамда аерып чыгаруым юкка түгел, билгеле. Ул гади кенгурудан аермалы буларак баланың урнашуы буенча слингны хәтерләтә. Ягъни, бу рюкзакта балага уңайлы, рәхәт. Тик андый сыйфатлы букчаларның бәяләре дә шактый кыйммәт тора – 5 мең сумга табып булса яхшы әле.

Менә кыскача шулар, җәмәгать. Шәхсән минем өчен слингтан да уңайлырагы юк. Бала өчен дә, әни өчен дә һәм, әлбәттә, бәя ягыннан да. Бәйләргә өйрәнеп интегүне санамаганда, билгеле.

Бу минем шәхси фикер. Ә сез үзегез яхшылап сайлагыз, өйрәнегез! Шул чакта үзегезнең күңелгә хуш килгәнне ичшиксез табарсыз.

Яшь әни язмаларыннан…

Бала еш авырый… Нишләргә?

“Бала авырый да, авырый… Әле генә терелгән иде, тагын маңкалаган инде!” Бу җөмләләр кайсы гына ата-анага таныш түгел икән… Хәер, андыйлар бардыр. Шәхсән миңа, кызыма бер яшь тулганчыга кадәр, бу сүзләр, чыннан да, таныш түгел иде. Тик инде ярты ел диярлек үзем шулай дип зарланам…

Кагыйдә буларак, һәрбер әни яңа туган сабыен тузан бөртеге дә тидерми, саклап кына үстерергә тели. Тик кызганыч, бу мөмкин түгел! Теләсәң-теләмәсәң дә, яңадан-яңа дару исемнәре, табиблар белән танышырга туры килә. Ярар ла, теге яки бу авыруны дәваладың да, шуның белән гомерлеккә саубуллашсаң. Кайчакларда алар әледән-әле яңадан килеп чыгарга гына тора икән бит!

Юк, бу язмада сез бер генә файдалы киңәш тә тапмассыз. Киресенчә, бу гел зарлану язмасы булачак! Әгәр дә миңа киңәш бирә алучы тәҗрибәле әни кеше табылса, тагын да яхшырак.

Дөресен әйтим, бер яшькә кадәр без гомумән дә авырмаганбыз икән! Мин авыру дип уйлаган нәрсәләр исә гади җил кагылып китүләе генә булган. Ә мин шуларга нервы әрәм итеп ятканмын! Ә авырулар исә бала ротовирус йоктырып, хастаханәдә ятып чыккач башланды. Яхшылап терелеп бетәргә дә өлгермәдек, салкын тиеп чирләдек. Маңка, ютәл, температура. Анысын гына дәвалап бетердек дигәндә, кызымның тавышы юкка чыкты. “Кискен фарингит” диделәр. Анысын да дәваладык. Шушы афәтләр белән көрәшү өчен ике айлап вакыт узды. Тулысынча терелеп, бераз хәл алуга, тагын понос, тагын температура. Аллага шөкер, бу юлы косып чирләмәде инде, авыруны үз көчебез белән генә җиңүгә ирештек…

Озаклап язып тормыйм: алга таба да нәкъ шулай дәвам итте. Әле берсе, әле икенчесе! Яңа елны да диарея һәм температура белән каршыладык, хәтта. Менә хәзер дә бер ай инде маңка һәм ютәл дәвалыйбыз.

Бу проблема мине бик каты борчуга сала, җәмәгать. Баланың иммунитеты бик түбән, ул микроб һәм вирусларга каршы көрәшә алмый дигәнрәк начар уйлар да килә башка. Яхшы иммунолог эзләп интернет челтәрен дә актара башладым инде…

Хәер, минем бу “борчуларым” турында ишеткәч, ике бала анасы булган тәҗрибәле дустым кычкырып көлде. “Әй, карчык, балаң авырганга сөен. Ул чирләгән саен, киресенчә, иммунитеты яхшыра гына. Балалар бакчасына йөри башлагач, азрак чирләр”, — диде. Икенче бер танышым да шуны ук хуплады. Хәер, ул “бакчага йөри башлагач, күрәселәрең алда әле…”, — дип “юатты”.

Әби-бабайларга исә, һәрвакыттагыча, безне генә сүгәргә булсын. “Баланы теләсә-кая өстерәп йөрисез. Өйдә генә ятыгыз!”, — ди алар. Тик өйдә генә яту шулай ук дөрес түгелдер бит, ә?! Тирә-якта күпме балалар мәйданчыклары булганда, бала белән өйдә утырасы килми дә килми инде. Өйдә генә утыру баланың үзе өчен дә күңелле түгел. Аның кем белән дә булса шаярасы, уйныйсы килә. Һәркөнне бер үк кеше (ягъни, мин) белән вакыт үткәрү аңа инде күптән кызык түгел. Уен арасында бер – ике килеп иркәләнеп китү җитә аңа.

Кыскасы, белмәссең! Бердәнбер теләк: барлык авыруларда үткече генә була күрсен! Бәлки чыннан да, бакчага йөри башлагач, авырудан туктарбыз әле.

Яшь әни язмаларыннан

Ташламалар – балага кием җыябыз! /КИҢӘШЛӘР/

Бу язмамны әти-әниләр өчен иң көнүзәк, мөһим мәсьәләгә багышлыйсым килә! Ул да булса, балага кием сатып алу! Беләм инде, беләм… бу тема һәркем өчен актуаль. Һәркемнең баласын матур итеп киендерәсе килә, тик берәү дә моңарга кесә-кесә акча сарыф итәргә теләми…

Андый ата-аналарга нәрсә ярдәмгә килә? Әлбәттә, ташламалар! Тик кибетләрдәге әлеге шау-шулы чордан дөрес итеп файдалана белергә кирәк. Хәтта, алдан әзерләнү сорала. Ничекме? Хәзер өйрәтәм.

Хәтерлисез микән, балага ташламалы кием-салым җыю турында бер тапкыр язган идем инде. Ул чагында сүз җәйге скидкалар турында барды. Хәзер исә кышкы ташламалар чоры тәмамланып килә. Өстәвенә, мин бу өлкәдә инде ша-а-актый тәҗрибә туплаган ана. Шуңа күрә бу юлы “распродажа”лар турында сөйләп, теориягә бирелеп тормыйм, ә турыдан-туры гамәли якка күчәм.

Мин бүген сезне ташламалар вакытында иң матур, иң кәттә кием-салымны шактый яхшы бәягә “эләктереп калырга” өйрәтермен. Скидкалар чоры тәмамланып килгәндә генә киңәш бирергә алынуым өчен гафу итегез инде, җәмәгать! “Бөтен отышлы вариантларны җыеп бетергәнсең дә, хәзер безгә акыл сатарга булгансың”, — дип уйлый күрмәгез тагын! Дөресен генә әйткәндә, бу темага бер язгач, башка язмам дип уйлаган идем. Тик дөресен әйтим, әлеге кышкы распродажа вакытында миңа осталыгымны шактый гына чарларга туры килде, хаталарым өстендә дә эшләдем. Менә шулар нигезендә, сезгә сөйләр сүзем күп җыелды. Иң мөһиме, борчылмагыз: күз ачып йомарга да өлгермәссез, инде җәйге ташламаларга да чират җитәр.

Ярар, эшкә күчик!

Беренче төп киңәш: гадәти чорда кибеттә матур бала киеме күрсәгез, шундук сатып алырга ашыкмагыз. Югыйсә, 1500 сумга сатып алынган күлмәкне (ыштан, сандалины) 1-2 айдан соң 600-700 сумга күреп, йөрәгегез кысылып куячак! (Ышаныгыз, үз тәҗрибәмнән чыгып әйтәм). Әлеге киемне сатып алыр алдыннан барысын да яхшылап уйлагыз: бу кием балага бүген үк кирәкме, ташламалар чорына кадәр күпме вакыт калган… Әгәр дә ашыгыч рәвештә кирәк нәрсә түгел икән, сабыр итегез, көтегез! Иң яхшысы, аның артикулын фотога төшереп алып, кибетнең интернет версиясеннән эзләп табу һәм күзәтеп тору! Складта бетә башлый икән, теләсә-кайсы вакытта заказ бирергә була!

Икенче киңәш бала гардеробындагы иң кыйммәт кием – кышкы-язгы комбинезоннарга кагыла. Бер комбинезонны бер генә кышлык итеп алу отышлы түгел! Ким дигәндә, ике кышлык булсын. Моның өчен, әлбәттә, баланың параметрларын, үсү тизлеген белергә кирәк. Әлбәттә, һәрвакытта да бу нәтиҗәгә ирешеп булмый, тик шулай да тырышып карарга кирәк. Һәм иң мөһиме, зур киемдә балага уңайсыз булыр дип курыкмагыз. Бер дә уңайсыз түгел! Аннары соң, киләсе сезонга комбинезонны нәкъ менә хәзер — кыш ахырында алып куйсаң яхшы. Хәзер аларның иң “тәмле” чоры – 50, хәтта 70 процентлы ташламалар белән алырга мөмкин. Бу пункт аяк киемнәренә дә кагыла.

Тагын бер мөһим киңәш – ташламалар башланганны алдан күзәтеп торыгыз! Кибетләрнең сайтларын кыш көне — декабрь, ә җәй көне июнь урталарыннан ук карый башласагыз яхшы. Ә иң әһәмиятлесе, ташлама башлану турында ишеткәч, баш-күзне тондырып, кибетләргә чапмагыз. Скидкаларның беренче агымында бик кирәк әйберләрне генә алып куйсаң яхшы. Ә инде башка кием-салымны соңрак, скидкаларның икенче, өченче агымында җыегыз. Бу юлы ташламалар тагын да арта, 40 процент урынына, 60, хәтта 70 процентка кадәр җитәргә мөмкин.

Төп киңәшләр менә шулар. Аз, тик иң мөһиме, файдалы! Ышаныгыз, шулай иткәндә, шактый гына акчаны кесәдә саклап калу мөмкинлеге бар!

Яшь әни язмаларынан

Бала һәм ата-ана… Моң тулы шигырь юллары

Ата-ананың баласына булган мәхәббәте әйтеп-аңлатып бетергесез. Күпме шагыйрьләр әлеге бөек хисне шигырь юлларына салган! Сез дә укып карагыз. 

Әти яки әни түгелме?

Апа! Әнә, тәрәзәгә кара,
Берәү уза, әни түгелме?
Күрегезче! Ашыгып монда керә,
Мине алырга ул килдеме?
Ул керде дә бөтен бала-чага
Аның каршысына йөгерде.
Тәмле иде, тел очында тора
Кәнфитенең әле дә тәме.
Барыбызны күзләп, карап чыкты.
Танымады ахры ул мине.
Әйтегезче аңа, мин бүлмәдә,
Апа ул соң күрдеме мине?
Карады да барчабызны ныклап,
Борылды да ят апа китте.
Алып китте үзе белән безнең
Аңа карап туган өметне.
Апа! Әнә, тәрәзәгә кара
Берәү уза, әти түгелме?

Лилия Сәлахетдинова

*****

Кызыма

Матур-матур төшләр күрә-күрә,
Бүленмичә, тәмләп йокла, кызым.
Синең өчен әле төннәр кыска,
Гомер шундый озын.

Мин төненә мең мәртәбә торып,
Юрганыңны төзәтермен, кызым, —
Минем өчен инде гомер кыска,
Төннәр шундый озын…

Шәмсия Җихангирова

*****

Бала дип…

Бала дип, баш булып йөрмә балаңа,
Бала дип, яшь диеп йөрмә балаңны.
Яхшылыкка өйрәт аны — онытма
Балаң синнән hәрчак үрнәк алганны.

Безсез белмәс бала караны-акны,
Бездән башка бала булыр көр-шатмы?
Пакъ күңеленә чәч изгелек орлыгын,
Үсеп чыксын — ычкындырма форсатны.

Кулдан килгән кадәр өйрәт балаңны…
Көне җиткәч, кош канаты таладыр —
Берәм-берәм китәрбез без… Бездән соң
Җир язмышы балаларга каладыр.

Әҗинияз Тәҗибаев
Марс Шабаев тәрҗемәсе

*****

Синең өчен, балам

Синең өчен, балам, синең өчен
Ак таңнарның телим атканын,
Сандугачлы таңын, кояшлысын,
Чишмәләрнең чылтырап акканын.

Синең өчен, балам, синең өчен
Тынычлыгын телим җиремнең,
Кагылмасын, берүк, кагылмасын
Шаукымнары кырыс җиленең.

Синең өчен, балам, синең өчен
Хәтфә таулар, яшен үзәннәр,
Былбыл кош моңнары синең өчен
Яшел келәм — яп-яшь үләннәр.

Синең өчен, балам, синең өчен
Яктыртырмын барыр юлыңны,
Йөрәгеңә салам якты нурлар,
Суз әле, суз, балам, кулыңны.

Наилә Әюпова

*****

Балам — Балан

Барам әле урманнарга,
Җыеп кайтырга балан.
Бөтен күңел назларымны,
Тик сиңа бирәм балам.

Эзли торгач барып чыктым,
Өстенә баланлыкның.
Барлык шатлыкларын күреп,
Үс балам,балалыкның.

Уйда балам. Өзәм балан —
Җимеше тәлгәш-тәлгәш.
Чыклы балан тәлгәшеннән,
Керфегемә тамды яшь.

Гөлсем Нәбиуллина

*****

Улыкаем минем

Улыкаем минем, алтыным,
Иң кадерлем, яратканым!
Зәңгәр күзле, аксыл чәчле,
Әниең сыман матурым.
Тугыз гына әле синең,
Туып яшәгән елларың.
Йөрәккәең дә бәләки,
Йомшак кына кулларың.
Син бит минем шатлыгым,
Күпме минем көтеп алган,
Бердән-бер бәхет кошым!
Озакка сине күрмәсәм,
Саташыплар мин бетәм!.
Әгәр миңа каршы килсәң,
Кочагыма шул чак кертәм!
Әгәр кинәт чирләсәң,
Үземә урын мин тапмыйм!
Синең белән төннәр буе,
Үземне бер йоклатмыйм!
Улыкаем минем, алтыным,
Иң кадерлем, яратканым!
Зәңгәр күзле, аксыл чәчле,
Әниең сыман матурым!

Алмаз

http://tatarskiestihi.ru чыганагыннан