Нәни бала белән яңа ел бәйрәменә…

Яңа ел җитәргә санаулы көннәр калып бара. Бу исә театрлар, концерт залларында балалар өчен кыш бабай, кар кызы катнашында берсеннән-берсе кызыклы чаралар уза дигән сүз. Әлеге тамашаларга бик кечкенә балалар белән бару үз-үзен аклыймы һәм бу, гомумән, дөрес карармы – бүген шул турыда сөйләшик әле.

Әлбәттә, һәр әти-әнинең яңа ел алдыннан баласын сөендерәсе килә. Төрле тамашалар вакытында нәниләрнең сөенеч тулы күзләрен күреп, үзең дә, ирексездән, балаңны шунда алып барырга хыяллана башлыйсың. Тик менә психологлар фикеренчә, әлеге тамашалар нәниләрнең күбесе өчен стресс булырга мөмкин икән. Шуңа күрә билетларны берничә тамашага берьюлы алып алып куйганчы, башта бер генә бәйрәмгә барып карау таләп ителә.

Шунысы кызык, монда сүз бер яшьлек кенә түгел, ә өч-дүрт яшьлек балалар турында да бара. Мәсәлән, ике яшьтә рәхәтләнеп чыршы тирәли әйләнгән бала, өч яшендә бу тамашалардан уттан куркыккан кебек куркырга мөмкин икән. Шуңа күрә минем балам инде зур дип уйлап, юкка акча сарыф итү шулай ук дөрес булмаячак.

Хәзер безгә яшь тә дүрт ай һәм шушы көннәрдә генә дә кызым ике шундый тамашага чакырулы. Башта бармаска уйлаган идем дә, аннары исә фикеремне үзгәрттем – барып, күреп кайтырга карар кылдык – ошатмаса, өйгә юл тотарбыз, янәсе.

Тик әлеге бәйрәмгә барыр алдыннан яхшылап әзерләнергә карар кылдым. Аллага шөкер, интернетта хәзер теләсә-нинди мәгълүмат табарга мөмкин. Алар белән сезне дә таныштырам, бәлки ярдәме тияр.

Бактың исә, тамаша залында беренче биш-ун минутта баланы күтәреп торсаң яхшы икән. Чөнки аларның күбесе шулкадәр халык күрүгә берара куркып калырга, хәтта елап та җибәрергә мөмкин ди. Бераз күнеккәч кенә идәнгә төшерергә ярый.

Шулай да, нәни бала белән яңа ел тамашасына баруның төп кагыйдәсе нинди дип уйлыйсыз? Баланы кыш бабайдан читтәрәк тотарга тырышырга кирәк икән, ләбаса! Бактың исә, күп балалар сәер итеп киенгән, йөзе ап-ак сакал-мыек белән капланган әлеге яңа елның төп билгесеннән уттан курыккандай курка ди. Шуңа күрә ясле балалары катнашындагы яңа ел тамашалары күп очракта кар кызы катнашында гына үтә икән. (Менә сиңа мә… интернетны ачып укымасам, бу турыда уйлау башыма да кереп чыкмас иде. Тәҗрибәле әниләр миннән кыкырып көлгәннәрдер инде…)

Аннары соң яңа ел тамашасында сезнең нәни баланы сагалап торган тагын бер куркыныч бар. Нәниегез зал буйлап йөгерешеп йөрүче башка зуррак балалардан саклана алмаячак, шуңа күрә аны чыршы әйләнәсендәге тамаша вакытында этеп егулары, алай гына да түгел, таптап китүләре дә бик мөмкин. Шуңа күрә әни кешегә бу чарага каблуклы аяк киеме киеп бармаса яхшы. Бала артыннан йөгереп йөрү күпкә уңайлырак булачак.

Тагын бер мөһим кагыйдә – әлеге залның шактый салкын булуы да мөмкин. Шуңа күрә баланы җылырак итеп киендерү ягын карагыз. Ә кызу булган очракта һәрвакыт чишенергә мөмкин.

Шунысы да бар: хәзер авырулар, салкын тиюләр ешайган чор. Өстәвенә, балалар бер-берсенә чирне аеруча тиз йоктыра. Шуңа күрә халык күп булган урыннарга барганда, баланың борынына вирусларны тоткарлый торган препаратлар салу кирәк. Кайткач исә, борынны яхшылап юдыру таләп ителә…

Менә шулар, җәмәгать. Әлеге кагыйдәләрне “колагыма элеп куйдым да”, Аллага тапшырдым. Яңа ел тамашасына барасы гына калды…

Яшь әни язмалары…

Зур уңышларга этәрүче МАТУРЛЫК

Сер түгел, бүгенге заманда макияж кешене танымаслык итеп үзгәртергә сәләтле. Бу бер яктан кешене гүзәллеккә илһамландырса, икенче берәүләрне шаккаттырырга да мөмкин.

Кайвакыт хатын-кызлар визажистка макияж кирәк булганга гына түгел, үз-үзләренә ышану хисе җитмәгәнгә дә мөрәҗәгать итә. Аларның күбесе — тормышның авыр сынауларына дучар булган шәхесләр. Кеше күзеннән оялып, төртмәле сүзеннән тилмергәнгә матур макияж аларга аеруча да мөһим.

Мондый психолог-визажистлар хөрмәткә лаек. Гоар Аветисян — шундыйларның берсе. Тормышының авыр периодын кичерүчеләрне ул бушлай бизәндерә. Аның эшләрен һәм шатлыктан балкыган ул бизәндергән кызларны сезгә дә күрсәтәсебез килә.

Юлия шушы матур макияж белән хастаханәгә, рак авыруын бөтенләйгә җиңәргә юл тоткан


Хюррес Султан стилендәге образ барлык кимчелекләрне дә онытырга ярдәм итәр


Влада күзләренә 15 операция кичергән


Анастасия химиотерапия курсын үтә. Үзен искиткеч гүзәл итеп күрү авыру белән көрәшү өчен аңа тагын да көч өстәгән


Җәмилә 2,5 яшьлек чагында зур трагедия кичергән. Аның эзләре әле дә битендә саклана


Катяның тәне бик сизгер, теләсә кайсы факторга да бик «усал» реакция бирә


Лилия 2 операция кичергән. 2 тапкыр тиресен күчереп утыртканнар


Аня, ни кызганыч, алопеция белән авырый. Әлеге матур макияж аңа бер дигән мотивация булып торган

«Красота — страшная сила» ди руслар. Шушы фотоларны караганнан соң бу сүзләргә ышанмый мөмкин түгел. Әлеге гүзәл кызларга тиз арада терелүләрен теләп калабыз!

Мәктәп укучысының иртәнге ашы нидән гыйбарәт?

Башлангыч сыйныфларда укучы балалары булган әти-әниләр иртән балага нәрсә ашатып җибәрим икән дип баш вата торгандыр. Иртәнге аш көннең төп элементы бит: аның файдалы да, туклыклы да, тәмле дә булуы мөһим. Үсеп килүче организмга ярау икеләтә авыр.

Эшегезне җиңеләйтеп иртәнге аш вариантлары тәкъдим итәбез. Алар бик җиңел әзерләнә, өстә санап үтелгән барлык критерийларга җавап та бирә.


ИРТӘНГЕ АШ №1 — Бал һәм бананнан смузи
Продуктлар: ½ ст. сөт, ½ сыек йогурт, 1 аш к. арахис мае, 1 б. к. бал, 1 өлгергән банан.
Әзерләү: Бананны кечкенә кисәкләргә бүләбез. Барлык продуктлар белән бергә блендерга озатабыз.

ИРТӘНГЕ АШ №2 — Тортеллони
Продуктлар
Камыр: 300 г он, 3 йомырка, тоз
Эчлек: 300 г шпинат, 180 г рикота, 3 аш к. уылган пармезан
Әзерләү: Камырны ясап, өстен каплап суыткычка озатыгыз. Шпинатны пешереп алып турагыз. Аннары сырлар белән болгатыгыз, тәменчә тоз сибегез. Камырны алып шакмакларга бүлегез (өчпочмак өчен бүлгән кебек кирәк). Пәрәмәч формасында бөгеп тоз салынган суда пешерәбез.

ИРТӘНГЕ АШ №3 — Испанча омлет
Продуктлар: 5 йомырка, 300 г бәрәңге, 1 суган, 3 аш к. зәйтүн мае, тәменчә тоз һәм борыч.
Әзерләү: Чистартылган бәрәңгене вак-вак итеп түгәрәкләп турыйбыз. Суган турап, тоз сибеп икесен майлы табада кыздырып алабыз. Шуннан утны сүлпәнләтеп, тагын 15 минут пешергә калдырабыз. Йомыркаларны туглап тоз сибәбез. Ике катнашманы бергә кушып пешереп бетерәбез.

Гаилә психологиясе: Кышын баланы урамга ничек киендерергә?

Уф, кышкы һава торышына болай да мөкиббән китми идем, быел гомумән дә яратмый башлармын кебек тоела. Кызым белән урамга чыгып киткәндә, өй бомба төшкәндәй булып кала. Мәш килеп киенгәндә, ул да, мин дә кызып пешәбез. Андый чакларда ике балалы хатыннарның урамга җыенуын күз алдына китереп, чәчләрем үрә тора, җәмәгать.

Аның каравы, кызым кышны аеруча яратты, ахрысы. Иртүк уянуга өй буйлап кышкы аяк киемен күтәреп йөри башлый. Кагыйдә буларак, урамга төшке аштан соң, ирне эшкә озаткач, җыена башлыйбыз. Башта үзем киенәм, аннары иң катлаулысы – баланы киендерү процессы башлана!

Хәтерләсәгез, узган ел балама нибары 4-5 ай вакытта урамга чыгып китә алмый җәфа чигәбез, дип бер тапкыр зарланган идем инде. Тик узган елгы кыш быелгысы белән чагыштырганда җәннәт булган икән бит! Бала бер урында гына ята, рәхәтләнеп киендер бит инде, ә мин әле зарланырга да вакыт тапканмын. Ә менә хәзер… Хәзер күрәм күрмәгәнемне! Саф һавага җыену процессы минем бөтен энергиямне суыра! Беренчедән, кызым минем төсле үк кышкы өс киемнәрен яратмый, аларны күрүгә йөгерә-кача, елый башлый. Мин исә аның артыннан чабам. Шапка кию, шарф бәйләү эше шулай ук бик авырлык белән бара. Кайчакларда беркая да чыкмый, өйдә генә утырасы килгән моментлар да була, хәтта! “Әй, кадалыплар китсен бу саф һава! Шәһәрдә нинди саф һава инде ул. Урамга чыктың ни, өйдә утырдың ни, барыбер бер үк һаваны сулыйсың…” дигәнрәк фикерләр дә кереп чыга башка. Тик мин үземне бик тиз кулга алам. Мин бит бик яхшы әни булырга тиеш, дим үземә.

Анысы бер хәл. Кыш көне урамга йөрергә чыгу белән бәйле икенче, күпкә җитдирәк проблема бар. Баланы ничек киендерергә? Әлбәттә, кышкы комбинезон кигерергә кирәк икәнлеген беләм инде. Ә эчтән нәрсә ? Педиатрлар бит бала туңарга гына түгел, кызып пешәргә дә тиеш түгел ди – тегеләй дә, болай да салкын тигерәчәк, имеш.

Шуңа күрә мин бу мәсьәләне яхшылап өйрәнергә булдым. Интернетта бу темага язмаларның очы-кырые юк. Тик менә аларның төгәл аңлашыла торганнары гына аз. Андагы бөтен киңәшләрне истә калдыра башласаң, баш миендә уйларга урын гомумән дә калмас иде, мөгаен.

Менә карагыз: курткалардагы җылыта торган материаллар да фәлән төрле хәзер. Холлофайбер, тинсулейт, файбертек, тек-полифилл… Шуның өстенә яшь әниләрнең авызыннан мембрана комбинезоннар яхшы дигән сүз дә еш ишетелә. Аңлап кына җитеш!

Шуңа күрә бүген сезгә кышкы комбинезон төрләре турында сөйләп тормыйм. Үземнең тәҗрибәм белән генә уртаклашам. Баланы кыш көне ничек киендерергә дигән сорауга әллә ни зур игътибар да бирмәс идем, мөгаен. Шулай да, күптән түгел шундый мәгълүматка тап булдым: бактың исә, балаларның 80 проценты салкын тию белән иммунитет түбән булганга түгел, ә әти-әниләрнең аларны урамга дөрес итеп киендерә белмәве нәтиҗәсендә чирли икән. Мәсәлән, быел без мембрана комбинезон сатып алдык. Ә белгечләр әгәр урамда температура -10 градустан җылырак икән, бу кием астына колготки һәм юка кофта кигерү белән чикләнергә киңәш итә. Аннары соң әлеге эчке кием тулысынча мамык һәм тулысынча синтетика булмаска тиеш икән. Югыйсә, баланың туңуы яки тирләве ихтимал.

Дөресен генә әйткәндә, бу сүзләр мине бераз шаккаттырды. Мин башка бик күп әниләр кебек үк баланы никадәр калынрак киендерсәң, шулкадәр яхшырак дип уйлый идем, ләбаса. Хәзер исә үземнең бу мәсьәләгә карашымны үзгәртергә туры килә! Балама колготки, озын җиңле футболка кигерәм дә, өстеннән кышкы комбинезонны элеп урамга ашыгабыз. Андый чакларда үз-үземә баласын салкын тигерергә алып чыккан юләр әни булып тоелам. Тик шаккаткыч, әлегә бер тапкыр да чирләп карамадык әле. Белгечләрнең сүзләрендә дөреслек бар, ахрысы.

Көннәр әкренләп суыта. Ә мин үз-үземне үзгәртү өстендә эшлим. Тулысынча барып чыгармы, юкмы, әлегә белмим. Урамга чыгудан гомумән баш тартып өйдә генә утыра башламасак ярый инде…

Яшь әни язмалары…

Саубул, шампунь! / Чәч үстерү киңәшләре /

Әбиләрегез сөйләгәннән ишеткәнегез бар идеме икән, Совет заманында чәчне 2 атнага бер юганнар ди, имеш. Ә атна саен юу артык еш дип саналган.

Хәзерге шампуньнар белән көн саен юарга да була. Вәгъдә ителгәнчә, алар чәчне саклый, ныгыта, үз төсен тагын да матурлата, буялган булса төсен саклый.

Тик нишләптер элек әбиләребез калын-калын толымнар белән йөрсә, бүген күбебез кыска чәчкә өстенлек бирә. Хәер… өстенлек бирәме, әллә чәчләр хәзер элеккегечә үсмиме? Сорауның асылы да шушында.


Чәчләрегез матур да, сәламәт тә булсын дисәгез, әбиләр рецептына колак салыгыз. Алар юкны киңәш итмәс.

1. Сода. Уч төбенә сыйган хәтле сода алабыз, су белән болгатабыз һәм шушы «ботка»ны чәчнең тамырына ышкыйбыз. Бу катнашманы маска буларак куллансагыз да ярый: ваннага кергәч аны чәчкә сылап 20 минут тирәсе тотыгыз. Артыннан кыска чәчкә чирек стакан, озын чәчкә ярты стакан уксус белән чайкагыз. Мондый процедураларга чәч озак ияләшсә дә, 3-4 атнадан чәчләрегезнең сизелерлек ныгыганын тоярсыз.

2. Сабын. Органик косметика сатылучы кибет, аптекаларда сыек сабын алыгыз. Үлән чәе, 2 бал кашыгы чәй агачы мае белән болгатыгыз. Әлеге катнашма кавыктан, хәтта беттән котылырга да ярдәм итәр.

3. Алоэ Вера. Аның согын баш тиресенә ышку кирәк. Шулай ук кавыктан котылырсыз, чәч коелудан туктар, кан йөрешен яхшырта.

4. Какос мае хуш ис, матур кыяфәт дигән сүз. Аны шулай ук үлән чәе белән болгатып баш тиресенә массаж ясау кирәк. Тик артыннан әйбәтләп чайкагыз. Чәчләрегез ялтырап торыр, ефәк шикелле булыр.