«Әниләр һәм бәбиләр» бергә җыелса, нәкъ бер автобус кеше була! /видео, фоторепортаж/

«Әниләр һәм бәбиләр» командасын күпләр телевизор экраннарындагы «Бәби көтәбез әле» дигән клиплары аша белә. 2016 елда төшерелгән видеоязмада җырчылар Лилия Муллагалиева, Гүзәл Идрисова, Айгөл Шәйхетдинова, Гөлназ Шәрипҗанова, алып баручы, сценарий язучы Зәмирә Рәҗәпованың бәби көткән мизгелләре сурәтләнә. Шушы клип, аралары 1-2 атна булып туган сабыйлары аларны берләштерә дә куя. Хәзер алар бергә җыелса, нәкъ бер автобус – 21 кеше була икән!

21 апрельдә Филармония концертлар залында узган концертның исеме дә шундый – «Әниләр һәм бәбиләр». Күпләрегез, Г.Камал театрының Туфан Миңнуллин әсәре буенча куелган «Әниләр һәм бәбиләр» әсәрен дә хәтерлидлер. Бу исем очраклы рәвештә шулай куелганмы, әллә сәбәп башкадамы?

– «Әниләр һәм бәбиләр» исеме брендка әйләнде. Туфан Миңнуллинның шушы сүзләрендә хаклык бар. Плагиатлык дип кабул итмәсеннәр, ләкин бу исем безгә бик туры килеп тора. Безнең төп геройлар да – әниләр һәм бәбиләр бит. Әлбәттә, Туфан абыйның пьсасыннан аермалы буларак, биредә безнең әтиләр дә бар. Әсәрдә – роддом күренеше, шуңа безнең тамаша аннан төптән аерыла. Без кызлар белән киңәшләштек. «Әтиләр» дигән сүзне өстәргә дигән фикер дә бар иде. Шулай да «Әниләр һәм бәбиләр»гә тукталдык, – дип аңлата Зәмирә Рәҗәпова.

Хәер, бәбиләре туганчы да таныш булган алар. Зәмирә Рәҗәпова белән Гөлназ Шәрипҗанова Татарстанның Халыклар дуслыгы йортында бергә эшли. Лилия Муллагалиева белән да аралаша торган булган Зәмирә ханым. Гөлназ Шәрипҗанова белән Айгөл Шәйхетдинова элемтәне өзмәгән. Шулай бер-берсенең бәби алып кайтулары турында белгәннәр. «Безнең карашларыбыз, кем әйтмешли, җеннәребез туры килгәндер», – дип сөйли Зәмирә ханым.

Әниләр арасында иң яше – Гөлназ Шәрипҗанова. «Барыбызның да балага узганны белгәч, безнең Лилия бер төркемгә җыйды. Шунда аралашып, бер-беребездән сораша идек. Әле беренче балам булгач, интернеттан төрле мәгълүмат укып, аларга караганда, күбрәк белә идем. Мисал өчен, нинди фирма подгузнигы кидертергә дигән мәсьәләдә Япониядә җитештерелгәнне тәкъдим иткәч, алар да шундыйны алып, сыйфатлы булуына инана иде. Минем шуны әйтәсем килә: аларның тәҗрибәле булуы әле бер нәрсә дә сөйләми. Хәзер инде кызыбыз Асылбикәгә 2 яшь тулды. Бала үстерү процессы – иң татлы миизгелләр. Безнең төркемдәге башка бәбиләрдән аның олырак булуы сизелә. Моны башка әниләр дә әйтә. Ул инде чыгып сәхнәгә чыгып кылана, башын ия, аның сәхнәгә чыгасы килеп тора. Иң мөһиме – сабыйларыбыз авырмасын», – ди Гөлназ.

Әтиләре булдыра алырмы?

Сер түгел, «Әниләр һәм бәбиләр»нең әниләре генә түгел, әтиләре дә бик иҗади. Илназ Баһ, Ришат Шәйхетдинов, Илсур Шәрипҗанов җырлый. Киләчәктә «Әтиләр һәм бәбиләр» проектын булдырырга җыенмыйлармы, дип сорагач, «Юк», дип елмая бу ханымнар. Ә шулай да мондый концерт була калса, ул әниләрнекеннән аерылып торыр иде, мөгаен. Зәмирә ханым әйтүенчә, анда күбрәк җыр түгел, ә сөйләү, шаяру, спорт күбрәк булыр иде. «Бездә бит күбрәк сентиментальлек, бишек җырлары, «мимишный» әйберләр күбрәк», – ди ул.

– Минем уйлавымча, әтиләр мондый әйбер оештыра алмас иде. Ирләр бит алар ул яктан таркаурак. Мондый вакытта бит җыелышырга, репетицияләр ясарга, костюмнар буенча сөйләшергә, кибетләрдә йөрергә, балаларга family look булдырырга кирәк. Боларның барысы да бик күп энергия таләп итә. Моны бары тик хатын-кыз эшли аладыр. Чөнки ирләр мондый эшне башкара калса, аларның үзләре белән җитәкләргә кирәк. Без бөтен эшне бүлештек. Ә әтиләр алай булдыра алмый. Алар үзләре балалар кебек. Мисал өчен, Илназга көн саен җыр яздырырга кирәклеге турында әйтеп торгач кына, «Әти сүзе» дигән җыр язды. Үзләренә дә ошады ул. Киләчәктә әтиләр «Нигә әле шушы җырга клип яздырмаска?» диләр, – дип сөйли Гүзәл Баһ.

Балалар – фәрештә төсендә

Биш әнинең һәрберсенең үз функциясе икән биредә. Гөлназ Шәрипҗанова шарлар, декорация, анимация өчен җавап бирә. Зәмирә Рәҗәпова режиссура ягын карый. Гүзәл Идрисова җырлар яздыру, студияләр белән сөйләшү өчен җаваплы. Айгөл Шәйхетдинова исә видеолар яздыруны оештырган. Лилия Муллагалиева исәп-хисапны, бухгалтерияне алып бара.

Киемнәргә кадәр дә артистлар алдан килешенеп эшләгән. Мисал өчен, беренче образ – патшабикәләрнең таҗларын кигән, матур, «воздушный» күлмәкләр. Икенчесе – эшлекле образ. Өченчесе инде, анысын хәтта фотосессиядәге фотолардан да күреп була иде, хуҗабикә образы. Шушылар белән әниләрнең төрле – патшабикә кебек гүзәл, офисда эшли ала торган, өйдә балаларны тәрбияли, өйне карап тотучы хуҗабикә булуын да күрсәтергә теләгәннәр. Ә балаларны исә ак төстән киендерергә булганнар. Ак – сәхнә өчен килешә торган төс. Җитмәсә, ул фәрештә төсе. Әлбәттә, family look алымын да кулланганнар.

Әниләре сөйләде, бәбиләре ни дияр?

«Әниләр һәм бәбиләр» булгач, димәк, төп геройларның берсе – бәбиләр булып чыга бит! Ә алар сәхнә артында мәш килә. Илсур һәм Гөлназ Шәрипҗановларның кызы Асылбикә пианинода уйный. Зәмирә Рәҗәпованың малае күзәтеп йөри. Күңелле монда!

Шул арада, без Лилия Муллагалиева кызы – Ильвина, Ришат һәм Айгөл Шәйхетдиновлар малае – Рәсим, Илназ Баһ белән Гүзәл Идрисованың уллары Камилне очраттык та алар белән сөйләшеп алдык. Камил «Я татарский не знаю», дип киреләнсә дә, әнисеннән бераз эләккәч, тәти малайга әйләнде дә куйды!

– Минем кечкенә энем Ильяс бар. Мин әнигә бәбине карашам, уйныйм, йоклатам, – ди 8 яшьлек Ильвина.

– Минем ике энем бар – Рамил һәм Марсель. Мин аларны юындырам, – ди 6 яшьлек Камил.

– Минем Риана исемле сеңлем бар. Мин аны уйнатам, аның артыннан җыештырам, – дип сөйли 8 яшьлек Рәсим.

– Энеләрегез-сеңелләрегез булгач, алар өйне туздыра, алар артыннан җыештырырга да туры киләдер?

Камил:

– Миңа әле икесе артыннан да җыештырырга туры килә. Залда да, бүлмәдә дә уенчыкларын туздыралар. Залда җыештырып кына куям, бүлмәгә барам, икенче тапкыр залга килгәндә, тагын туздырып аткан булалар. Мин бер әйберне дә туздырмыйм, мин – тәртипле малай.

– Бу бәбиләр елыйлар, кычкыралар, комачаулыйлар… Кайвакыт алар сезне туйдыралармы?

Ильвина:

– Юк, мине туйдырмыйлар.

Камил:

– Ял көннәрендә – шимбә һәм якшәмбедә генә туйдыралар. Ул вакытта мин әнигә «Алар кычкыра», дип әйтәм.

Рәсим:

– Мине Риана бик аз вакытта гына туйдыра.

– Сезнең эне-сеңелләрегез еш елыймы?

Ильвина:

– Минем энем уенчыгын алсаң, елый. Шуңа мин аны алмаска тырышам. Безнең һәрберебезнең аерым уенчыгы бар. Кайвакытта энем минем телефонны да тартып ала. Бирергә теләмәсәм дә, «Бир-бир!» дип кычкыра, әниләргә әйтә.

Рәсим:

– Минем дә сеңлем миннән телефон сорый, үзенә бирергә куша. Ул елагач, әти белән әни дә «Бир!», диләр.

– Сезнең өйдә тып-тыныч вакыт кайчан була?

Камил:

– Алар икесе дә (энеләре – авт.) өйдә булмаганда. Энеләрем йә әти белән эшкә киткән була яки бөтен гаилә белән каядыр киткән була. Мин өйдә берүзем калам. Кечкенә энем Марсель йоклаганда, әти яңа концертларына җырлар өйрәнә. Әни көн саен телефонда утыра. Аннан музыка кабыза да, ашарга пешерә. Мин яраткан токмач ашы әзерли.

Ильвина:

– Ильяс йоклаган вакытта, ул еламый. Ул чакта әни телефонда утыра, смслар яза, җырлар куялар. Әти – компьютерда. Ә мин – телефонда.

Рәсим:

– Риана йоклаганда, әти эштә була. Әни телефонда утыра. Минем әни аннан музыка куя да җырлый.

– Сез үзегезнең энеләрегезне-сеңелләрегезне яратасызмы һәм ничек итеп?

Ильвина:

– Мин бик яратам. Аны кочаклыйм да яхшы уен уйнатам. Без Ильяс белән качышлы уйныйбыз. Безнең качышлы уйнар өчен, өй зур. Аскы якта, подвалга, залда качабыз. Ильяс мине тиз таба. Мине кочаклаганда, мине үпкәндә, аны аеруча яратам.

Камил:

– Мин дә яратам.

Рәсим:

– Мин нык яратам. Яратуымны кочаклап белдерәм.

Баһ – Микки Маус, Илсур – Тедди аюы

«Әниләр һәм бәбиләр»нең әниләре шушы концертта бишәүләп 4 җыр башкарды. Һәркемгә дә таныш булган «Бәби көтәбез әле», «Бәхетле бул, балам»нан кала, тагын – «Бишек җыры» һәм Хәния Фәрхи репертуарыннан «Балаларга фатыйха» җырлары. Концерт дәвамында һәр гаилә видеоэкраннан үзе сөйләде. Ришат һәм Айгөл Шәйхетдиновларга – «Иң хисле гаилә», ә Илсур һәм Гөлназ Шәрипҗановларга «Иң яшь гаилә» исеме бирелде. Илсур Гыймадиев һәм Лилия Муллагалиева гаиләсе «Иң хәрәәктчән гаилә» икәнлеге ачыкланды. Илназ Баһ һәм Гүзәл Идрисова исә – «Җырлы-кояшлы гаилә» булды.

Гомумән, тамашачыны шаккаттыра торган әйберләр күп булды тамашада. Лилия Муллагалиева ире Илсур белән дуэт башкарды, кызлары Ильвина спорт гимнастикасы номерын күрсәтте, әнисе белән бергә җырлады. Баһларның олы малае Камил берүзе җыр башкарды. Ә Шәрипҗановларның кызы Асылбикәне сәхнәдән алып кереп китә алмадылар. Зәмирә Рәҗәпованың малае сәхнәдә хоккей уйнап күрсәтте.

Берзаман сәхнәгә аниматорлар чыгып, балалар белән уйнарга кереште. Баксаң, аларның «Әниләр һәм бәбиләр»нең әтиләре булуы ачыкланды. Микки Маус – Илназ Баһ, Тедди аюы – Илсур Шәрипҗанов, бүре – Ришат Шәйхетдинова, дуңгыз баласы – Максим Куприянов, юлбарыс баласы Илсур Гыймадиев булып чыкты.

«Әниләр һәм бәбиләр» концертының беренче карлыгачы Биектауда узган. Моның сәбәбе генераль репетиция уздыру булган. Нәкъ менә Биектаудагы концерттан соң, тамаша барышында кайсы җырларны урыннарын алмаштырырга, кайсы элементларга үзгәрешләр кертергә кирәклегенә төшенгән артистлар. Киләчәктә дә планнары зурдан. Инде хәзердән үк аларны төрле районнарга чакыралар. Тик бер нюанс бар. Алар – 21 кеше. Бөтен нәрсә балаларга бәйле, иң мөһиме – аларның сәламәтлеге. Инде май аенда Арча, Теләче, Саба, Яшел Үзән, Әтнә, Актаныш, Яр Чаллыда концерт куярга җыеналар. Ә октябрьдә «Әниләр һәм бәбиләр»не карарга өлгерми калганнар, бу тамаша белән Казанда хозурлана алачак.

Алинә МИННЕВӘЛИЕВА
Ринат НӘҖМЕТДИНОВ видео һәм фотолары

«Мин хәзер – картәти. Чыннан да, кадерле статус икән ул”, – ди җырчы Айдар Галимов

“Беренче ярыш! Беренче җиңүләр! – дип, “Башваткыч тапшыруын алып баручы Зөлфәт Зиннуров кызы Зәлиянең уңышлары белән уртаклаша. – 25 метр араны аркада йөзеп, Зәлия 3нче урын яулады! Ех-хоу! Апасы өчен сеңелесе Зифа да бик куанды. Тренерыбыз Алинә Гыймадиевага зур рәхмәт! 3нче урыны да бик килешеп тора бит әле аңа, чөнки 333 – Зиннурова Зәлия Зөлфәт кызы”.


“Лучше всех” тапшыруында катнашкан, 4 яшьлек ТВ йолдызы Арслан Сибгатуллин Алексеевск районы Ялкын авылына дәү әниләрендә кунакта булган.

– Арслан авылны бик ярата. Урманга чыгып, табигать белән хозурланып йөрибез. Мунчалар кергәч, балалар белән карга чумабыз. Кечкенәдән чыныктырам. Минем әни – музыка укытучысы, баянда уйный. Кечкенә улыбыз Әскәр дә баянда уйнарга өйрәнә, Арслан җырлый. Безнең өйдәге концертны карарга дип, күршеләр дә җыела, бик күңелле була.


Җырчы Резедә Шәрәфиеваның кызы Зөләйхага 7 январьда 12 яшь тулды.

– Кызым ел саен кызыксынуларын үзгәртеп тора. Түгәрәкләргә кызыксынуы бетсә, шунда ук туктыйбыз. Биюгә дә йөреп алдык, җырга бик басым ясамыйбыз. Хәзер менә рәсем ясау белән мавыга. Кибеттән альбом, буяулар ташыйбыз. Шулай ук йогага йөрибез. Берәр эш кушсам, “ярар, әни” ди. Шул сүзен яратам да инде. Без кечкенә чакта “хәзер” дибез дә, сузып йөри идек, – ди Резедә Шәрәфиева.


 

Җырчы Айдар Галимовның да хәзер инстаграмы бар. Ул анда балалары, дуслары белән төшкән фотоларны элә. Күптән түгел оныгы Сафия дә (олы кызы Гүзәлнең кызы, 2 яшь) бабасының инстаграмында пәйда булды. “Оныгым тугач, бер танышымны очраттым. Ул: “Хәзер җырчы, депутат кебек статусларың төшеп кала, син хәзер – картәти (бабай)”, – диде. Чыннан да, кадерле статус икән ул”, – ди җырчы.

Җырчы Әнвәр Нургалиев: «Бер-беребезне күз карашыннан да аңлыйбыз»

Җырчы Әнвәр Нургалиевның кызы Элина 6нчы сыйныфта укый. Менә биш еллап инде бию белән шөгыльләнә. “Кызым белән бер йолдызлык астында туган без. Әллә шуңа бер-беребезне күз карашыннан да аңлыйбыз. Элина бик максатчан, көчле холыклы кыз. Куйган максатларына һәрвакыт ирешә. Үз әйткәнен эшли. Өйдә вакытта кулдан төрле эшләнмәләр эшләргә ярата. Дус кызларына, безнең туган көннәргә дә үз куллары белән ясаган бүләкләр бирә”, – ди әтисе Әнвәр Нургалиев.


Җырчы Ильвинаның кызы Раянага көз көне 6 яшь тулды. Раяна бик сәләтле бала. 5 яше тулганчы ук Халыкара мәктәптә укый башлады. Кечкенә чагында ук вокал дәресләренә йөрде, инглиз телен өйрәнде. Ләкин әнисе аның җырчы булуын теләми. “Башка профессия кешесе итеп күрәсе килә, мәсәлән, архитектор. Әмма шул өлкәне сайласа да, юлына аркылы төшмәячәкмен”, – ди ул. Раяна татарча аңласа да, күбрәк русча сөйләшә икән.


Ә менә җырчы Марсель Вәгыйзовның 1нче сыйныфта укучы улы Шамилнең җырга кызыксынуы бетеп киткән. 3-4 яшендә гармунга кушылып “Арча” көйләрен, әтисенең җырларын җырлаган малай бүген башка нәрсәләр белән мавыга. “Аның өчен кибеттән алган уенчыклар кызык түгел. Ул сәгатьләр буе лего детальләреннән берәр әйбер төзергә яки кулына каләм алып, дәфтәргә язып, рәсемнәр ясап утырырга мөмкин”, – ди әтисе. Шамил музыка мәктәбендә балалайка классында укый. Беренче ярты еллыкны яхшы билгеләргә генә тәмамлаган.


Алма агачыннан ерак төшми, диләр. “Казан” бию ансамбле җитәкчесе Чулпан Закированың олы кызы 8 яшьлек Ясминә дә әнисе җитәкләгән ансамбльнең балалар студиясенә йөри. Республика күләмендә узган барлык бәйгеләрдә актив катнаша. Бик яратып рәсем мәктәбенә йөри, инглиз телен өйрәнә икән. “Ә менә минем биюләрне бик яратып бетерми, – дип елмая әнисе. – Кызганычка каршы, актив кызыбыз аягын авырттырып, соңгы бер айда гипста йөрергә мәҗбүр булды әле. Әкренләп рәтләнәбез. 4 яшьлек кызыбыз Айшә исә, чын актриса. Фантазиясе бик көчле. Сүз артыннан да кесәгә керми”.


“Болгар радиосы” алып баручысы Гөлназ Фәйзрахманованың кызы Сәлимәнең соңгы вакыттагы иң зур уңышы: “Р” хәрефен әйтергә өйрәнгән. “Үзе дә сизмәстән килеп чыкты, балалар бакчасында шөгыльләнүче логопед-тәрбиячесенә рәхмәт! Өйдә хәзер гел “р-р-р”лап йөри”, – дип елмая әнисе. Сәлимә барлык балалар кебек рәсем ясарга, җырларга ярата. Икенче ел “Казан” бию ансамбленең балалар төркеменә яратып йөри. “Кызымда бер нәрсә шаккатыра, кечкенә генә булса да хәйләкәр ул. Майлый-җайлый, алданганыңны, аның капкынына эләккәнеңне сизми дә каласың”, – дип тә өстәп куя әнисе.


Журналистлар Әдилә белән Данил Сафаровларның улы Сабирга алты яшь тулган. Әти-әнисе “Яңа гасыр” каналында эшләгәч, телевидение тормышына экскурсия ясарга да мөмкинлекләр чыккалый икән үзенә. “Переведи” тапшыруында катнашырга да өлгергән. Сабир балалар бакчасында инглиз теле, бию һәм оста куллар түгәрәгенә йөри. Кышын чаңгы шуарга ярата. Быел яңа чаңгы да алганнар үзенә. Киләчәктә әтисе картинг (“карт” дип аталучы ярыш машинасында йөрү) белән кызыксындырмакчы була үзен.

«Әниләр һәм бәбиләр» — 5 йолдыз-әни сезне кунакка дәшә /фотолар/

21 апрель көнне Филармония концертлар залы балалар авазына күмеләчәк, ди. Чөнки биредә «Әниләр һәм бәбиләр» концерты көтелә. Әлеге уникаль концерт-проектта 5 йолдыз-әни һәм аларның гаиләләре, балалары катнашачак икән. Барлык нечкәлекләр хакында да катнашучы әниләрнең берсе, танылган җырчы Лилия Муллагалиева сөйләде.

— Лилия, әлеге проект кемнең идеясе ул? Кайсыгыз аны күтәреп алды?

— Без — 5 әни — балаларыбызны бер вакытта күтәрдек. Үзем дә авырлы булганда «Бәби көтәбез әле» җырына клип төшерү теләге белән яндым. Эстрадабызның бәби көткән артистларын җыеп шушы клипны эшләп аттык, шулай дуслашып-туганлашып беттек. Хәзер социаль челтәрләрдә үз чатыбыз бар, һәрдаим шунда хәлләр белешеп, аралашып торабыз, бергәләшеп очрашуларга йөрибез, балаларыбызның туган көннәрен бәйрәм итәбез. Клиптан соң уртак проект эшләү теләге белән яндык. Шуңа моны аерым беребез уйлап тапты дип әйтү дөрес булмас: ул барыбызныкы да. Бүгенге көндә бергәләшеп пыр туздырып әзерләнеп йөрибез.

— Әтиләрегез, ирләрегез дә катнашамы?

— Әйе, катнаша. Шуңа концертка исем биргәндә бик уйлашкан идек. Алар да булгач «Әниләр һәм бәбиләр» дип атау бик үк дөрес булмас кебек тоелды. Аннары ирләребез дә кемнеңдер бәбисе, ә әни кеше 9 ай буе карынында йөртә, шуңа «Әниләр һәм бәбиләр» дияргә булдык. Ирләребез барыбызның да иҗади шәхесләр. Минеке, мисал өчен, гармунда уйный, Замирәнеке барабанчы, калган кызларныкы барыбыз да белгән җырчылар. Шуңа концерт оештыру зур хезмәт сораса да, артык авырлык тудырыр дип уйламыйм.

— Ә балаларыгыз тамашачыны ни белән шаккатырачак?

— Иҗади номерлары белән: уен коралында уйнап, биеп, җырлап. Гомумән, балаларны кеше алдында чыгыш ясарга оялмаска, үз фикереңне ышанычлы итеп җиткерә белергә өйрәтәсем килә. Ә зур аудитория алдында чыгыш ясау нәкъ шушы сыйфатларны тәрбияләргә ярдәм итәчәк тә. Сәхнә кешесе булмасын ул, барыбер бу сыйфатларсыз тормышта яшәп булмый. Шуңа әлеге проект барыбызга да кирәк.

— Дәвамлы булырмы ул?

— Дәвамлы итәсе килә. Безнең планнар бик зурдан, башкарып чыграг язсын. Әлеге концерт шушы планнарга беренче омтылыш кына әле. Киләчәктә иҗади һөнәрләр белән генә мавыкмыйча, кул хезмәте куеп эшләүче балаларны да бер мәйданчыкта берләштерәсебез килә. Зур чыгымнар таләп ителә, әлбәттә. Тик бу кирәкле хезмәт. Без тамашачыга гаилә, ир белән хатын мөнәсәбәтләрен, әти-әни тормышында бала ролен, гаиләләр дуслыгының әһәмиятен сурәтлисебез килә. Яшь буынга матур гаилә — җәмгыять тоткасы дигән үрнәк буласы иде.

Илүзә БИКЧӘНТӘЕВА

Абыем маҗарасы — «Шаянтуй» сәхифәсеннән кызык хәлләр

«Шаянтуй» сәхифәсендә бүген — Актаныш районы, Богады мәктәбене укучыларының кызык хәлләре. Рәхәтләнеп укыгыз! 

Абыем маҗарасы

Моны миңа әни сөйләде. Абыемның әле 1нче сыйныфта укыган чагы икән. Иртә белән мәктәпкә барырга чыккан. Түбән оч Бибинур апа басып тора икән. Кулларын каш өстенә куеп, абыйны танырга теләп: «Син кем малае, улым?» — дип сораган. Абый әтинең исемен әйткәч, Бибинур апа аның аркасыннан сөеп: дәвамын астарак укыгыз👇👇👇😂

 

Фирдус Тямаев: “Улым белән охшаганмы без?”

Фирдус Тямаевның инстаграмында еш кына улы Раянны да күрергә мөмкин. Ул әтисенә охшаганмы? Ә Гүзәл Идрисованың иң зур байлыгы нинди? 4 яшь чагында ук әти-әнисеннән туган көненә сейф сорап алган баланы кайсы йолдызныкы икәнен беләсезме? Бу сорауларга җавапны «Инстамизгел» сәхифәсеннән табарга була.


Популяр җырчы Фирдус Тямаевны олылар гына түгел, балалар да үз итә. Моны аның концертларында гына түгел, инстаграмында да күрергә мөмкин. Җырчы берничә тапкыр Саратовта яшәүче Камилә исемле кечкенә кызның елый-елый аны үзе янына чакырган видеосын урнаштырды. Соңыннан шушы шәһәргә баргач, ничек итеп кызчык белән сәхнә артында күрешүләрен, бергәләп, сәхнәдә чыгыш ясауларын да интернетка куярга онытмады. Кыз бик бәхетле иде. Фирдуснең инстаграмында еш кына улы Раянны да күрергә мөмкин. “Улым белән охшаганмы без?” – дип, менә шундый фото куйган. Охшаган, ә!

 


Җырчы Гүзәл Идрисова уллары белән горурлана: “Минем җимешләрем. Олысы Камил футбол белән шөгыльләнә. Уртанчыбыз Рамил 4 яшен тутыргач йөри башлаячак. Кечкенәсе Марсель әлегә кая алып баралар – шунда бик шатланып бара. Балалар – иң зур байлык. Сәламәт, бәхетле булсыннар”, – ди әни кеше.


“ТНВ” каналында эшләүче Миләүшә Сибгатуллинаның олы улы Кәрим – 6нчы, кечкенәсе Хәким 2нче сыйныфта укый. Олыларның: “Үскәч кем буласың?” – дигән сорауларына Хәким: “Банкир булам”, – дип җавап бирә икән. 4 яшь чагында ук әти-әнисеннән туган көненә сейф сорап алган. Бүгенге көнгә кадәр әби-бабасы, әти-әнисе биргән акчаларны шунда җыя малай. Ә менә Кәримнең режиссер буласы, кинолар төшерәсе килә. Хәтта хәзердән ук сценарийлар яза башлаган.