“Тукай иленә сәяхәт”

Бөек шагыйребез туган көне якынлашканда мәктәпләрдә төрле чаралар – викториналар, кичәләр, бәйгеләр, ачык дәресләр уза. “Сабантуй” журналы да мондый чаралардан читтә калмый. 23 апрельдә безгә Казанның Ш.Мәрҗани исемендәге 2нче гимназиядә Г. Тукайның иҗатына багышланган сыйныфтан тыш уку дәресендә катнашырга насыйп булды. Әлеге чара “Тукай иленә сәяхәт” дип аталды.

Ике командага (яшел һәм сары) бүленеп, малайлар-кызлар (2нче “В” сыйныфы укучылары, сыйныф җитәкчесе – Кадрия Рашат кызы Гарәпшина) “Туган тел”, “Шигърият”, “Зирәкләр”, “Дуслык”, “Оста куллар”, “Эзтабарлар” бирем-тукталышларда көч сынаштылар. Җырладылар, шигырьләр сөйләделәр, мәкальләр әйтештеләр, Г. Тукайның шигырь-табышмагына коллаж ясадылар, шагыйрьнең шигырь юлларын китапларыннан эзләделәр.

Кайсы команда җиңде дип уйлыйсыз, дуслар? Әлбәттә, дуслык!

Уен-кичәне оештырган, алып барган педагог-китапханәче Раушания Мөнир кызы Байрашева ахырдан укучыларны татлы ризыклар белән сыйлады.

Рәзинә Исмәгыйлева