Укчы-бала. Ул нинди?

Укчы йолдызлыгы астында туган балагыз турында күбрәк беләсегез киләме? Йолдызлар фикеренә дә колак салыгыз. 

 

Укчы-бала ялгызлыкны яратмый. Аңа һәрдаим кеше арасында булу кирәк. Сөйләшеп, аралашып утыру мөһим түгел, Укчыларга үзләрен кеше арасында тою рәхәт. Шуңа да ялгызы бүлмәдә калса елаган балагызга исегез китмәсен — гадәти күренеш.

Укчыларның күңеле гомер буе сабыйныкыдай яшь калачак. Һәр эштә дә гаделлек таләп итәчәкләр, ялганны кичермиячәкләр. Хәтта әти-әниләрен дә гадел, дөреслек яклы булсалар гына хөрмәт итәрләр. Әгәр Укчы фикеренчә кеше хаклы түгел кән, гафу сорый белергә тиеш. Шунсыз алар алдында дәрәҗәгез булмас.

Укчы-балалар бик кызыксынучан. Иртәсе сорау белән башлана, киче сорау белән тәмамлана. Кайвакыт мавыгып китеп арттырып җибәргәнен дә тоймаска мөмкиннәр.

Тагын бер үзенчәлекләре: үлеп ирек яраталар. Аларның шәхси пространствосына керүдән тыелыгыз.

Укчы-балагызны кечкенәдән акча тотарга өйрәтегез, пөхтә булырга өндәгез. Моның гади генә ысулы да бар: 1 атнага җитәрлек акча бирегез, аны 2 көндә тотып бетерсә дә, өстәмәгез. Кызгану хисенә дә бирелмәгез.  Әлеге сабак аңа киләчәктә кирәк булачак әле.

Укчылар укырга ярата. Алар өчен уку — үзенә күрә бер кызыклы уен ул. Тиктормаслык һәм түземсезлекләре генә киртә булырга мөмкин.

Укчы-бала гел алга карап яши. Шуңа тирә-юньдәге каршылыкларны күрмәскә дә мөмкин. Тик алар гына аңа үзенекенә ирешергә каршылык тудыра алмас.